Ս.թ. հուլիսի 17-ին Հայաստանի Հանրապետության ոստիկանության պարեկապահակային ծառայության գնդի վրա զինված խմբի կողմից ձեռնարկված հարձակման արդյունքում հեղվեց հայի արյուն, ծանր հարված հասցվեց մեր ազգի հեղինակությանը:
Անչափ ցավալի է, որ այդ գործողության կազմակերպիչներից ոմանք Ղարաբաղյան պատերազմի մասնակիցներ են… Մարդիկ, որոնց հետ կողք-կողքի, նույն խրամատում կանգնած, պաշտպանել ենք հող-հայրենին, իսկ այսօր, կարծես թե` հայտնվել բարիկադի տարբեր կողմերում:
Թե որքանով է հիմնավորված ու վեհ հակառակ կողմում հայտնված հայրենյաց պաշտպանի նպատակն ու դրան հասնելու միջոցների ընտրությունը, ցույց կտա պատմությունը, բայց որ այսօր արդեն ունենք հայի խեղված ճակատագիր, երկատված ժողովուրդ և աննախանձելի ներքաղաքական իրավիճակ, դա ակնհայտ է…
Ակնհայտ է, քանզի այս պահի դրությամբ ունենք Արցախի պաշտպանության համար մարտնչած, բայց հայի ձեռքով սպանված հայ գնդապետ, հայի կրակոցից վիրավորված հայ քաղաքացիներ, հայի ձեռքում գտնվող հայ պատանդներ, այդ թվում նաև կին…
Կարդացեք նաև
Այսքանից հետո մենք` ձեր երեկվա մարտընկերները, սխալվել, թե±, պարզապես, երևակայության ուժով հավատացել ենք, որ հանձինս ձեզ ունենք հայրենիքի ճակատագրով մտահոգ զինակիցներ…
Դատելով ստեղծված ծանր իրավիճակից, պարզվում է, որ սխալվել ենք… Սխալվել ենք, քանի որ ձեր ընտրած ճանապարհով դուք հյուծում եք ազգն ու հայրենիքը, այլ ոչ թե` տանում հզորացման…
Չմոռանանք, որ ապրիլյան դեպքերից շատ կարճ ժամանակ է անցել և չի բացառվում առավել դաժան ու երկարատև առճակատման հավանականությունը… Հանգամանք, որը մեզ հուշում է ոչ թե ներքին ընդվզումներով ջլատել մեր համազգային դիմադրողականությունը, այլև առաջնորդվել միաբանվածության և համախմբվածության տեսլականով… Գիտակցեք, որ պառակտիչ գործողություններով դուք թուլացնում եք առանց այն էլ դժվար ժամանակներ ապրող Հայաստանը… Իսկ թուլացնելով Հայաստանը` վտանգում եք նաև Արցախի ապագան:
Ի տարբերություն ձեզ, մենք` երեկվա պատերազմի մասնակիցներս, հավատացած ենք, որ սոցիալ-տնտեսական բազմաթիվ հիմնախնդիրներ ունեցող մեր երկրի ապագա հաջողության հիմքը խաղաղ ու հետևողական բարեփոխումներն են, որ Արցախի անկախության ու նրա տարածքային ամբողջականության լիարժեք ապահովման գրավականը մեկս-մյուսին հասկանալու, այլ ոչ թե հասարակությանը սեփական պետության դեմ լարելու մեջ է…
Ելնելով ստեղծված աշխարհաքաղաքական ու տարածաշրջանային ոչ միանշանակ իրավիճակից, Արցախի ազատամարտիկների միությունը կոչ է անում ինչպես զինված խմբի անդամներին, այնպես էլ վերջիններիս անհավասարակշիռ գործողություններից ոգևորված մի շարք հասարակական ու քաղաքական կազմակերպություններին ձեռնպահ մնալ Մայր Հայաստանի ներքաղաքական վիճակը սրելու անհեռատես քայլերից և բռնել խոհեմության ճանապարհը: Իսկ այդ ճանապարհը մեկն է` ենթարկվել Հայաստանի Հանրապետության Սահմանադրությանն ու օրենքներին և գնալ ստեղծված իրավիճակի խաղաղ հանգուցալուծման:
Արցախի ազատամարտիկների միություն
Մայր Հայաստանս ո՞րնա…. անկախ երկիր եք չէ՞, ամեն տեղ սաղդ ճղում եք ձեզ, որ ԼՂՀ-ն անկախ ա.. դե պահեք ձեզ, ի՞նչ կապ ունեք «մայր Հայաստանի» հետ…
80-ականների ՛՛Իզվեստիա՛՛ և ՛՛Պրավդա՛՛ թերթերի ոճով գրված մի նամակ է սա, որի տակ չկա անգամ ստորագրություն ու ամիս-ամսաթիվ, որը կվկայեր, որ նամակը ձևակերպվել է ակտիվ քննարկումների ընթացքում:
Ակնհայտորեն սա գրել են մի երկու ֆունկցիոներ, որոնց տիրապետության տակ է գտնվում կազմակերպության կնիքը, ասենք՝ իրենց Մանվելն ու Շմայսը:
Ի դեպ՝ վերջիններս սույն ամսի տասնյոթից սկսած դեպքերի վերաբերյալ գոնե թեթևակի կարծիք չեն հայտնել, ախր ի՞նչ ասեն, կամ ասեն, որ ի՞նչ անեն:
Հարգելի արցախյան ֆունկցիոներներ, նման նամակ գրելուց առաջ դուք պետք է մտածեիք ո՛չ թե ձեր Սերժիկ հոպարի շահերի՝ այլ իրոք Հայաստանի և Արցախի իրական անվտանգության և հնարավոր առաջընթացի մասին, իսկ երբ նման կողմնակալ նամակ եք հրապարակում, պետք է գիտակցեք, որ ՛թուլացնելով Հայաստանը` վտանգում եք նաև Արցախի ապագան՛՛: