Ինչպես ավելի վաղ հայտնել էինք, Խորենացի փողոցի արգելափակված հատվածից այսօր ոստիկանները արգելապատնեշից այն կողմ էին տարել մի աղջկա եւ նրա ավտոմեքենան: Տաթեւիկ Ադիլյանը ավտոմեքենան կայանել էր արգելափակված հատվածի հարակից խանութի դիմաց, ինչից հետո էլ տեղի էր ունեցել դեպքը:
Aravot.am-ի հետ զրույցում նրա մայրը՝ Հասմիկ Գինոսյանը նշեց, որ իր աղջիկը խուլիգան չէ, պարզապես մեքենան կայանել էր գնումներ անելու նպատակով: «Ուղիղ եթերով տեսա, որ ոստիկանները աղջկաս թեւերից բռնած տարան ներս: Աղջկաս ասել են՝ մեքենադ հանի, աղջիկս էլ պատասխանել է, թե ոստիկանական որոշ ավտոմեքենաների կարելի է կայանել, իսկ իրեն ո՞չ»,- դժգոհեց Հասմիկ Գինոսյանը:
Նա տեղում զանգահարեց ոստիկանական մի քանի բաժանմունք, որտեղից պատասխանեցին, որ նրա աղջիկն իրենց մոտ չէ:
Կարդացեք նաև
«Աղջիկս վիրահատվել է հոկտեմբերին, եթե հարվածեն երեխայիս ու Աստված մի արասցե մի բան պատահի, արարքներիս համար պատասխանատու չեմ»,- բղավում էր տիկին Հասմիկը:
Նա նաեւ տեղեկացրեց, որ աղջկա հետ հեռախոսակապ հաստատել չի հաջողվում: Այնուհետեւ Հասմիկ Գինոսյանը մոտեցավ արգելապատնեշի մոտ հավաքված ոստիկաններին, ապա որոշ ժամանակ անց դուրս եկավ հատուկ պահպանվող տարածքից եւ շտապելով հեռացավ:
Լուիզա ՍՈՒՔԻԱՍՅԱՆ
