Երեկ ի պաշտպանություն «Սասնա ծռեր» խմբի երթից հետո բերման են ենթարկվել 64 հոգի, եւ 63-ն ազատ են արձակվել՝ բացառությամբ «Հիմնադիր խորհրդի» անդամ Արմեն Միքայելյանի:
Բերման ենթարկված եւ ազատ արձակվածներից մեկի պաշտպանը՝ փաստաբան Արսեն Մկրտչյանը քիչ առաջ իր ֆեյսբուքյան էջում գրառում էր արել. «Ոստիկանությունը Խորենացի փողոցից բերման է ենթարկել քաղաքացուն Ավան և Նոր֊ Նորքի բաժին, այնուհետև տեղափոխել Էրեբունու բաժին և արգելել ինձ` փաստաբանիս, տեսակցել վստահորդիս, պատճառաբանելով, որ իմ կյանքին վտանգ է սպառնում։
Երբ զանգահարեցի 1֊02 և տվեցի հայտարարություն հանցագործության մասին ու տեղեկացրեցի թեժ գծով ՄԻՊ գրասենյակին, վստահորդիս հեռախոսով ինձ կապնվեց մի ոստիկան և ասեց` «Ախպերս, հեսա բաց եմ թողնում, թող մի հատ պարտավորագիր գրի, որ դեմ է տեռորիզմին ու գա»: Ի պատասխան այդ «հանճարեղ նախաձեռնությանը», հայտնեցի, որ պաշտպանյալս որևէ բան չի գրելու առանց ինձ։
Մի քանի րոպե անց քաղաքացին ազատ արձակվեց առանց նախապայմանների։ Այնուհետև կրկին զանգահարեցի 1֊02 և խնդրեցի հաղորդումս թողնել անհետևանք, կարծես թե ամեն ինչ հարթվեց, սակայն, միևնույն է մնաց այն տհաճ զգացողությունը, որ այս երկիրը երկիր չի դառնա, քանի դեռ որոշ ոստիկանների գործելաոճի մեջ չկա ոչ միայն օրինականության գերակայության սկզբունք, այլ նաև տարրական բանականություն»:
Կարդացեք նաև
Aravot.am-ը ՀՀ ոստիկանության հասարակայնության եւ լրատվության բաժնի պետ Աշոտ Ահարոնյանին խնդրեց պարզաբանել փաստաբանի այս հայտարարությունը, որին ի պատասխան նա ասաց. «Փաստաբանը բոլոր հիմքերը ունի եւ օժտված է այդ իրավասությամբ, դիմել, բողոքել , ուսումնասիրվի, կա ծառայողական քննություն եւ կա հատուկ քննչական ծառայությունում գործ, այնպես որ դրանք ուղղեք իրենց»:
Անուշ ՄԱԹԵՎՈՍՅԱՆ
