Հայաստանի օլիմպիական պատվիրակությունը սկսել է խումբ առ խումբ մեկնել Ռիո դե Ժանեյրո, որտեղ օգոստոսի 5-ին մեկնարկելու է 31-րդ ամառային օլիմպիական խաղերը: ՀԱՕԿ-ի նախագահ Գագիկ Ծառուկյանը ուղերձ է հղել Հայաստանի օլիմպիական հավաքականներին:
Հարգելի մարզիկներ, մարզիչներ: Դուք լավ եք գիտակցում Օլիմպիական խաղերում հաղթանակ տանելու կարևորությունը: Կասկածից վեր է, որ Ռիո դե Ժանեյրոյում մեկնարկելիք ամառային Օլիմպիական մարզահանդեսում հաջող մրցելույթներով բարձր կպահեք Հայաստանի սպորտի պատիվը: Մեր հանդիպումների ընթացքում դուք, որ ներկայացնում եք տարբեր մարզաձևերի ֆեդերացիաներ, խոստացաք առավելագույն քանակով օլիմպիական ուղեգրեր ձեռք բերել: Դուք կատարեցիք ձեր խոսքը: Մնում է՝ կատարեք նաև մեդալներ նվաճելու ձեր խոստումը և արժանապատիվ ելույթներ ունենաք «Ռիո – 2016 » -ի Օլիմպիական Խաղերում:
Մարզաշխարհի հարգարժան ներկայացուցիչնե՛ր, դուք մշտապես ցուցադրել եք ձեր ունակությունները, հաղթանակներ եք տարել և աշխարհի տարբեր անկյուններում նպաստել եք մեր հայրենիքի ճանաչմանն ու հեղինակության բարձրացմանը:
Հավատում ու վստահում եմ ձեզ, բարձր եմ գնահատում ձեր հմտություններն ու կարողությունները, ձեր հայրենասիրական ոգին, քանզի անձամբ եմ ճանաչում յուրաքանչյուրիդ:
Կարդացեք նաև
Վստահ եմ՝ հուսախաբ չեք անի հեռավոր Բրազիլիայում: Ուշադրությամբ հետևելու եմ ձեր բոլոր ելույթներին: Ցանկանում եմ հաջող մեկնարկ և հաղթական ավարտ հերթական ` 31-րդ Օլիմպիական խաղերում: Աստված պահապան՝ բոլորիդ:
Աշոտ ՀԱԿՈԲՅԱՆ
