Նախորդ գիշեր Հայաստանի օլիմպիական պատվիրակության մարզիկների առաջին խումբը (նկար 1) Երեւան-Դոհա-Ռիո դե Ժանեյրո չվերթով մեկնեց Բրազիլիա՝ այնտեղ անցկացնելու Ռիո դե Ժանեյրոյում օգոստոսի 5-ին մեկնարկող 31-րդ ամառային օլիմպիական խաղերի նախապատրաստության վերջին փուլը: Իսկ ավելի վաղ մրցավայր մեկնել էին Հայաստանի օլիմպիական պատվիրակության ղեկավար եւ գլխավոր հանձնակատար, ՀԱՕԿ-ի փոխնախագահ Դերենիկ Գաբրիելյանը եւ Ռիոյում Խաղերի ադմինիստրատիվ աշխատակիցներ Անժելա Միրզոյանն ու Գոհար Հովհաննիսյանը (նկար 2):
Մեկնեցին ծանրորդները, թեթեւ աթլետները եւ լողորդները: Ներկայացնում ենք նշված մարզաձեւերի մեր օպիմպիական հավաքականների կազմը:
Ծանրամարտ,
Կարդացեք նաև
տղամարդիկ:
Անդրանիկ Կարապետյան, Առաքել Միրզոյան, Սիման Մարտիրոսյան, Գոռ Մինասյան, Ռուբեն Ալեքսանյան: Որպես պահեստային ծանրորդ Ռիո մեկնել է նաեւ Վանիկ Ավետիսյանը: ՀԱՕԿ-ի լրատվական բաժինը տեղեկացնում է, որ Առաքել Միրզոյանը թիմին միանալու է ավելի ուշ:
Կանայք:
Նազիկ Ավդալյան, Սոնա Պողոսյան:
Աթլետիկա:
Ամալյա Շարոյան, Դիանա Խուբեսերյան, Լեւոն Աղասյան, Լիլիթ Հարությունյան, Գայանե Չիլոյան, Գոռ Ներկարարյան:
Լող:
Վահան Մխիթարյան, Մոնիկա Վասիլյան: Երկուսն էլ Հայաստանի լողի ֆեդերացիայի եւ ՀԱՕԿ-ի միջնորդությանբ Խաղերին մասնակցում են սպիտակ քարտով:
Օրերս հայ օլիմպիականների եւ լրատվամիջոցների հետ հանդիպման ժամանակ ՀԱՕԿ-ի նախագահ Գագիկ Ծառուկյանը հայտարարել է, թե Ռիո դե Ժանեյրոյում օլիմպիական խաղերի բացման արարողության ժամանակ Հայաստանի դրոշակակիրը լինելու է լողորդ Վահան Մխիթարյանը: Ի դեպ, Վահանը Հայաստանի դրոշակակիր եղել է նաեւ Նանկինում անցկացված պատանեկան օլիմպիական խաղերում:
Այս գիշեր նույն չվերթով մրցավայր մեկնեցին նաեւ ՀԱՕԿ գլխավոր քարտուղար Հրաչյա Ռոստոմյանն ու մեր հավաքական թիմերի բժիշկները:
Մյուս մարզաձեւերի Հայաստանի օլիմպիական հավաքականները մրցավայր մեկնելու են գլխավոր մարզիչների կազմած գրաֆիկներով:
ԱՇՈՏ ՀԱԿՈԲՅԱՆ
«Առավոտ»
26.07.2016
