Ցուցարարները Խորենացի փողոցից հասան մինչեւ Հանրապետության հրապարակ: Նրանք վանկարկում էին « Հող հանձնողին հանձնել հողին»: Ոստիկանությունը չթույլատրեց գորգի հատվածով Հանրապետության Հրապարակ մտնել, ցուցարարները ստիպված Աբովյան փողոցով շարժվեցին դեպի Հրապարակ:
«Ժառանգություն» կուսակցության փոխնախագահ Արմեն Մարտիրոսյանը եւս կոչ արեց, որպեսզի բացի ԶԼՄ ներկայացուցիչներից, մյուսները չմտնեն հրապարակի՝ գորգի հատվածը: Հանրապետության հրապարակում ոստիկաններ կային՝ մահակներով եւ սաղավարտներով: Ցուցարարները Մելիք-Ադամյանով անցնելիս, որտեղ գտնվում ՀՀԿ գրասենյակը, շատ բարձր սուլեցին:
Ցուցարարների մեջ են նաեւ ՊՊԾ գնդի ներսում գտնվող Հայկ Կյուրեղյանի հայրը, «Արձագանք» ստուդիայի հիմնադիր Եղիշե Պետրոսյանը, Հիմնադիր խորհրդարանի անդամ Ալեք Ենիգոմշյանը, «Քաղաքացիական պայմանագիր» կուսակցության վարչության անդամ Նիկոլ Փաշինյանը եւ ուրիշներ:
Պարոն Փաշինյանը իր մասնակցությունը երթին այսպես հիմնավորեց. «Մենք հարթակում չենք լինի, բայց ինչ հնարավոր լինի անել պրոցեսին աջակցելու համար, կանենք…Ժողովրդի կամարտահայտումը պետք է տեղի ունենա եւ ի վերջո բերի կոնկրետ քաղաքական արդյունքի»,- ասաց նա: Իսկ այլեւս հարթակում չլինելը բացատրեց ընկալումների սկզբունքային տարբերություններով: Նա նշեց, որ փոխվել է նաեւ պայքարի խորհրդանիշը, ինքը բաց ձեռքերի կողմնակիցն էր, իսկ ցույցին այժմ բռունցքներ են, իսկ դա խորհրդանշում է պայքարի տրամաբանության փոփոխությունը:
Կարդացեք նաև
Հավելենք, որ մեծաթիվ են «Սասնա ծռեր» գրությամբ շապիկներով ու պաստառներով ցուցարարները:
Գոհար ՀԱԿՈԲՅԱՆ
