Ֆեյսբուքյան օգտատեր Դենիս Դվորնիկովը «Ֆեյսբուք» սոցիալական ցանցի իր էջում մի փաստաթուղթ է հրապարակել, որը տրամադրել է Ադրբեջանում Ռուսաստանի Դաշնության դեսպանատունը՝ ՌԴ քաղաքացի Մարիա Վալերի Միրզոյանի դիմումին ի պատասխան։ Ըստ Դվորնիկովի՝ Ադրբեջանում ՌԴ դեսպանատունը քաղաքացիներին վերաբերվում է հենվելով ազգային պատկանելիության, այլ ոչ թե քաղաքացիության հիման վրա։
Մարիա Միրզոյանը դիմել է Ադրբեջանում ՌԴ դեսպանատուն՝ խնդրելով պաշտպանել իր եղբոր իրավունքները, որն այս պահին ադրբեջանցի իրավապահների հսկողության ներքո է։
Բաքվում ՌԴ դեսպանատունը պատասխանել է քաղաքացի Միրզոյանի դիմումին՝ նշելով հետևյալը. «2016թ. հունիսի 23-ին Ադրբեջանի ՆԳՆ տրամադրած տեղեկության համաձայն՝ 2016թ. հունիսի 9-ից Ձեր եղբորը, հանցագործություն կատարելու կասկածանքով, բերման են ենթարկել ենթարկել Ադրբեջանի անվտանգության պետական ծառայության աշխատակիցները։ Ներկա պահին Մ.Վ. Ուելդանովը (Գալուստյան) գտնվում է ժամանակավոր պահման մեկուսարանում, նրա գործով իրականցվում են հետաքննական գործողություններ։ Դեսպանատան աշխատակիցները սահմանված կարգով դիմել են Ադրբեջանի ՆԳՆ-ին՝ Ձեզ թույլտվություն տրամադրել՝ Ձեր եղբոր գտնվելու վայրում նրան տեսակցելու համար։
Որպես տեղեկատվություն հայտնում ենք Ձեզ, որ Ադրբեջանի և Հայաստանի միջև զինված հակամարտության պայմաններում Ձեր եղբոր հայկական ծագումը ծայրահեղ բարդացնում է նրա պաշտպանությունը։ Առանց հապաղման կտեղեկացնենք Ձեզ՝ Մ.Վ. Ուելդանովի (Գալուստյան) մասին լրացուցիչ տեղեկության առկայության պարագայում»։
