«Նիկոլ Փաշինյանն այս ամենից ավելի շատ շահեց, քանի որ գործընթացի տերերը (նկատի ունի «Սասնա ծռեր» խմբի անդամներին,-խմբ.) գնդի ներսում են եւ իրենք են իրավիճակի տերը, իրենք են որոշում` ովքեր պետք է իրենց սատարեն եւ ովքեր կազմակերպեն իրենց սատարող զանգվածներին»,-կարծում է քաղտեխնոլոգ Վիգեն Հակոբյանը:
«Դիալոգ» մամուլի ակումբում այսօր նա նշեց, որ «Քաղաքացիական պայմանագիր» կուսակցության անդամ, ԱԺ պատգամավոր Նիկոլ Փաշինյանն, ըստ էության, կոնֆլիկտի մեջ չմտավ «Սասնա ծռերի» հետ եւ իր բաժին քաղաքական PR-ն իրականացրեց. «Նա հասցրեց դաշտից հանել նախկին տիտղոսային ընդդիմություններին` սկսած Լեւոն Տեր-Պետրոսյանից, վերջացրած ավելի փոքր «ձկներով»: Փորձեց ինքնահաստատվել եւ ցույց տվեց, որ ինքը որոշ պայմաններում, երբ խաղն ամբողջովին իրենը կլինի, կարող է ավելի լուրջ դերակատարում ունենալ: Նա փորձեց իրագործել իր հայտնի հայտարարությունը, թե ՀՀ-ում կա մեկ ընդդիմություն եւ այն ՔՊ-ն է»:
Ի դեպ, ասուլիսին նախատեսված էր նաեւ «Քաղաքացիական պայմանագիր» կուսակցության քաղխորհրդի անդամ Ալեն Սիմոնյանի մասնակցությունը, սակայն վերջինս տեղեկացրել է, որ կուսակցության նիստում կայացված որոշմամբ` ՔՊ-ն առայժմ հանդես չի գալու հայտարարություններով եւ մեկնաբանություններով:
Քաղտեխնոլոգը զարմանալի չի համարում այն փաստը, որ նորաստեղծ քաղաքական ուժերը եւս փորձում են ներկայացնել հեղափոխական եւ ընտրական սցենարներ. «Վարդան Օսկանյանը եւ փորձեց երեւալ: Բնականաբար, հասկանում ենք, որ դա քաղաքական PR է, իսկ Փաշինյանն ավելի բարձր վստահության քվե ունի հասարակության շրջանում, քան Օսկանյանը»:
Կարդացեք նաև
Լուիզա ՍՈՒՔԻԱՍՅԱՆ
