ՊՊԾ գունդը գրաված եւ պատանդառություն իրականացրած «Սասնա ծռեր» խմբի անդամների հետ հուլիսի 22-ին կայացած բանակցությունների արդյունքները «Շանթ» հեռուստաընկերության «Հորիզոն» լրատվական-վերլուծական ծրագրի ընթացքում հեռախոսակապով ներկայացրել է ԼՂՀ ԱԺ պատգամավոր, Արցախի հերոս, գեներալ Վիտալի Բալասանյանը:
«Ամենաբարդ եւ լուրջ խնդիրը կայանում է նրանում, որ արյուն չթափվի»,-ընդգծել է նա:
Ըստ Բալասանյանի, «Սասնա ծռերին» սնունդ հասցնելու հետ կապված բողոքներն այնքան էլ չեն համապատասխանել իրականությանը. ԱԱԾ-ն եւ ոստիկանությունը մատակարարում են սնունդ:
Վիտալի Բալասանյանը հիշեցրել է, որ երեկ առավոտյան ՊՊԾ գունդ է ուղեկցել բժշկական խմբի. պատանդները բուժզննություն են անցել. «Նրանց վիճակը նորմալ է: Խմբից կան երկու վիրավորներ, բժիշկները համապատասխան միջամտություն են արել, բողոքներ չկան: Խմբի անդամներին եւս առաջարկել եմ բուժզննություն անցնել, մեծամասնությունը հրաժարվել է: Կան մարդիկ էլ, որոնք օգտվել են բժշկական սպասարկումից»:
Կարդացեք նաև
Վիտալի Բալասանյանը նաեւ տեղեկացրել է, որ Պավլիկ Մանուկյանին տրամադրել է կապի միջոց` հեռախոս:
Բալասանյանը գտնում է, որ իշխանության առաջարկները կոմպետենտ են, սակայն խումբը դեռ քննարկում է դրանք. «Նրանք առաջարկում են այլ բաներ` Սերժ Սարգսյանի հրաժարականը, միջանկյալ կառավարության ձեւավորում, իսկ ամենակարեւոր հարցը դրել են Ժիրայր Սեֆիլյանի խափանման միջոցի քննարկումը, որն այս պահի դրությամբ ներկայացված է իշխանություններին եւ գտնվում է օրակարգային ամենակարեւոր հարցերում»:
Վիտալի Բալասանյանը համոզված է, որ ՀՀ-ում քաղբանտարկյալներ չկան, այնուամենայնիվ, ըստ նրա, խմբի կողմից որպես քաղբանտարկյալներ հիշատակվողների հարցը եւս օրակարգում է. «Իշխանությունների քայլերն ընդառաջ են եւ կարծում եմ` դրանք պետք է ընդունվեն»:
ԼՂՀ պատգամավորի խոսքով` Խորենացի փողոցում սադրանքներն անընդունելի են. «Պետք է զերծ մնալ ոտնձգություններից»:
Հիշեցնենք` երեկվա բանակցությունների արդյունքում «Սասնա ծռերն» այսօր հայտարարեցին, որ բաց են թողնում պատանդներից երկուսին:
Լուիզա ՍՈՒՔԻԱՍՅԱՆ
