Ազգային համաձայնություն կուսակցության նախագահ Արամ Հարությունյանը խայտառակություն է որակում ոստիկանների պահվածքը Խորենացի փողոցում. «Իշխանությունները ոչ թե պատային վիճակում են, այստեղ ցուգցվանգ է, ցանկացած քայլ իրեն վնաս է եւ պետությանն է վնաս: Այստեղ միակ քայլը այն է, որ արյունահեղություն չլինի՝ նախագահը հրաժարական տա»:
Ըստ Արամ Հարությունյանի, Հայաստանում իշխանություն չկա եւ իշխանությունը համարժեք քայլեր չի անում. «Սասնա ծռեր» խմբի տղաները ահաբեկիչ չեն: Նաիրի Հունանյանենց խնդիրն էր մարդկանց սպանել, կոնկրետ Վազգեն Սարգսյանին, այս տղաները նպատակ չեն ունեցել գնդապետին սպանելու կամ որեւէ մեկին: Դա ստացվել է, իրենց խնդիրը դա չի եղել»:
Արամ Հարությունյանը այսպիսի լուծում է առաջարկում. «Թող բոլոր քաղաքական ուժերը անցյալը դնեն մի կողմ, հավաքվեն, ոչ թե մեկը ասի դու անցյալում…ես եմ ընդդիմադիր, մյուսը ասի ես եմ: Չէ, բոլորը պիտի իրար կողքի կանգնեն, իրար ձեռք բռնեն: Մենք բոլոր իշխանությունների ժամանակ եղել ենք ընդդիմադիր, հիմա ես կանգնեմ ասեմ ե՞ս եմ միակ ընդդիմադիրը: Եթե ուզում ենք հարցը լուծվի, պիտի հավաքվենք: Բոլորն իրար հետ ունեն հակասություններ: Եթե այսօր ես կանգնեմ ասեմ, թե ով որ թվին ինչ է արել, սաղի վրով կանցնեմ ես»:
Մեր հարցին՝ հնարավո՞ր է այսպիսի միջոցներով ստիպել Սերժ Սարգսյանին, որ հրաժարական տա՝ Արամ Հարությունյանը պատասխանեց. «Իհարկե: Էրդողանը, որ Էրդողան է, դիմեց ժողովրդին, դուրս եկավ ժողովուրդը փողոց ու պաշտպանում էր իրեն: Սերժ Սարգսյանը եթե դիմի, նույնիսկ Շարմազանովը չի գա հրապարակ: Ոչ մեկը չի գա, Սերժ Սարգսյանը զրոյական վարկանիշ ունի, իր թիմում իրեն չեն սիրում, իր թիմակիցներից բիզնես է խլում»:
Կարդացեք նաև
Ըստ Արամ Հարությունյանի, այսօր անգամ Ժիրայր Սեֆիլյանը չի կարող «Սասնա ծռեր» խմբի տղաներին ասել՝ զենքը վայր դրեք. «Ոչ մեկը բարոյական իրավունք չունի ասի, չի կարող: Այդ մտավորականները, այն հայտարարությունը, որ գրել են, կերակրված մտավորականներն են, կերակրամանից օգտվել են: Ասում են՝ զենքը դնեն: Ի՞նչ դնեն, դա ուղղակի ստացվել է, այսօր այս վիճակն է»:
Հռիփսիմե ՋԵԲԵՋՅԱՆ
