Քանդակագործ Լևոն Թոքմաջյանը վստահեցնում է, որ «Սասնա ծռեր»-ի տղաները հայրենասերներ են: «Հայելի« ակումբում հակադրվելով այն որակումներին, թե նրանք ահաբեկիչներ են, քանդակագործը պատմեց այդ խմբի անդամների մասնակցությամբ մի դրվագ. «Դեռ 1990-ականներին, երբ ես Մարտունու շրջկենտրոնում Մոնթեի քանդակի վրա էի աշխատում, այդ նույն տղաները` Պավլիկը, միշտ գալիս ինձ ոգևորում էին, խրախուսում, մեր կողքին «գրադ» էր պայթում: Ուզում եմ ասել՝ նրանք էլ են խաղաղություն, ազատություն ուզում»:
Դառնալով իշխանական թևից հնչող այն հայտարարություններին, թե խմբի անդամների պահանջներին անդրադառնալու ժամանակը չէ, պարոն Թոքմաջյանը նեղսրտեց. «Ինչո՞ւ հետո, բա էլ ինչի՞ շուրջ են բանակցում: Ինչի՞ կարելի է Ալիևի հետ բանակցել, այս հայրենասեր տղաների հետ չի՞ կարելի: Ամենալավ լուծման բանաձևը կլինի այն, որ ազատ արձակեն Ժիրայր Սեֆիլյանին»:
Դառնալով ՀՀ ԱԺ պատգամավոր Նիկոլ Փաշինյանի այն հայտարարություններին, որ ինքն անելիք չունի այլևս Խորենացի փողոցում, պարոն Թոքմաջյանը զարմացավ, թե նեղանալը ո՞րն է. «Ես Նիկոլին հարգում եմ` գրագետ լրագրող, խելոք մարդ է, նեղացել է, ասում է այլևս այնտեղ չեմ գնա, զարմանալի է` ինչի՞ց ես նեղանում: Եթե դու գնացել ես որպես միջնորդ ոստիկանության և ժողովրդի միջև, որ արյուն չթափվի, ինչի՞ց ես նեղանում: Մենք ամենքս պատասխանատու ենք ամեն ինչի համար, այնտեղ ինչ էլ լինի»:
Տաթև ՀԱՐՈՒԹՅՈՒՆՅԱՆ
