Այսօր նախկին արտգործնախարար, Համախմբում կուսակցության նախագահ Վարդան Օսկանյանը հայտարարեց, թե դատապարտում է ոստիկանների երեկվա գործողությունները:
Aravot.am-ը նրան հարցրեց՝ երեկ արցունքաբեր գազ է կիրառվել՝ դատապարտում եք, Մարտի 1-ին Չերյոմուխայով կրակեցին չդատապարտեցիք՝ Վարդան Oսկանյանը արձագանքեց. «Այսօրվա մասին խոսենք» ու հեռացավ: Երբ ասացինք՝ դե գոնե իրավունքը դատապարտելու ունեցեք՝ նա հետ եկավ ու բացատրեց. «Մարտի 1-ին ես արտգործնախարար եմ եղել, ես ինձ համարել եմ քաղաքական ղեկավարության կազմում եւ այդ օրը համարձակություն եմ ունեցել, ինչն այսօր չունեն մեր ղեկավարությունը, ժողովրդի հետ խոսելու, լուծումներ առաջարկելու եւ նաեւ բանակցություններ անցկացնելու: Այսօր, եթե ես նույն պաշտոնում լինեի, լինեի քաղաքական ղեկավարության մեջ, կանեի նույնը: Ես մինչեւ հիմա ժողովրդի հետ խոսած կլինեի: Դրանից պետք չէ վախենալ: Հիմա, որ ամեն մեկը փախել է ինչ-որ մի տեղ, չգիտեմ, չեն ուզում խոսել, ասելիք չունեն, դա չէ ձեւը: Արհամարհում են, ժողովուրդը արհամարհված է այսօր: Եվ որովհետեւ ես Մարտի 1-ին նման պատասխանատվություն դրսեւորել եմ, այսօր նաեւ բարոյական իրավունք ունեմ այսօր այստեղ կանգնելու եւ խնդիր դնելու, հարց բարձրացնելու եւ պահանջատեր լինելու: Որովհետեւ ես, որպես իշխանության մեջ եղած մարդ, իմ պարտավորությունը, պատասխանատվությունը կատարել եմ: Այսօր ես 100 տոկոսով նույնը կանեի»:
Վարդան Օսկանյանը ավելի ուշ զրուցեց նաեւ ցուցարարների հետ, փորձեց շփվել քաղաքացիների հետ: Մարդիկ Ղարաբաղյան հարցն էին արծարծում: Մեկն ասում էր՝ զարմացած ենք ՀՅԴ-ի վրա, ամբողջ օրը հողեր, հողեր էին ասում, հիմա չկան, չեն երեւում, երբ հող հանձնելու հարց կա: Վարդան Օսկանյանը լուռ լսում էր բոլորի դժգոհությունները եւ գլխով անում:
Հռիփսիմե ՋԵԲԵՋՅԱՆ
