«Կարծես թե փոքր պատերազմ լիներ, միանգամից սեւ ծուխ եղավ, վրաներս լուսավոր մի բան եկավ, ու ընկավ ուղիղ ինձ վրա: Ամեն ինչ սեւացավ, ուժեղ խշշոց էր լսվում, խլացել էինք, մեկ էլ զգացի արյուն: Ինձ թվաց ոտքերս չկան»,Aravot.am-ին պատմում է երեկ ուշ երեկոյան Խորենացի փողոցում տեղի ունեցած բախումներից եւ պայթյուններից տուժած Մարինե Ինթերեզյանը:
Մարինեն հիմա «Էրեբունի» բժշկական կենտրոնում է, դեպքի վայրում անծանոթ քաղաքացին նրան արյունոտ տեսնելով իր մեքենայով տուն է տարել: Գիշերը Մարինեն ստիպված է եղել գնալ հիվանդանոց, քանի որ վերքերը խորն են եղել:՛
«Մարմնիս յոթ հատվածներում վնասվածքներ են, վերքերիցս «պլաստմասե» բեկորներ էին հանում: Բժիշկները մանրակրկիտ զննեցին ու, շնորհակալություն, ամեն ինչ արեցին»:
Կարդացեք նաև
«Էրեբունի» բժշկական կենտրոնից Aravot.am-ին ասացին, որ Մարինեի ստորին վերջույթների սալջարդեր են, պատառոտված վերքեր, անհրաժեշտ դեղորայք է ստանում, վաղն էլ վերքերը կմշակեն, բեկորների մնացորդները կմաքրեն, վերքերը կկարեն եւ, հավանաբար, մյուս օրը դուրս կգրվի: Նրա վիճակը ծանր չէ:
Մարինեն չցանկացավ իրեն լուսանկարենք, դեմքին վերքեր կային:
Հիվանդանոցից նաեւ տեղեկացրեցն, որ այս պահին «Էրեբունիում» երեկվա դեպքերից 7 տուժած է բուժում ստանում, արդեն 12 ոստիկան եւ մեկ քաղաքացիական անձ դուրս են գրվել հիվանդանոցից:
Իսկ թե ինչո՞ւ էր Մարինեն հայտնվել Խորենացի փողոցի դեպքերի կիզակետում, պատմում է. «Իմ հերոսները ջուր չունեն, սնունդ չունեն, որոշեցի գնամ ուղղակի իմ ներկայությամբ աջակից լինեմ: Մեկ ժամ էր այնտեղ էի, ու վերջին մասերում էի կանգնած, առջեւում ինչ էին խոսում՝ չէր լսվում, բայց նկատեցի դիմացում իրար վրա շշեր են նետում, հետո մարդիկ սկսեցին հետ վազել»:
Մարինեն ասում է ինքը 2008 թվականի մարտի 1-ի դեպքերին էլ է մասնակցել, այն ժամանակ վնասվածքներ չի ստացել. «Մի անգամ էլ, երբ Պուտին էր եկել, գազային պայմանագրի ժամանակներն էին, ցույց էինք անում, ինձ բռնեցին տարան ոստիկանական բաժին: Գիտեք, ես չեմ կարողանում անտարբեր մնալ. թե ինչ են անում իմ ազգի հետ, ինչ անարդարություններ են տեղի ունենում՝ վերից վար: Ու այդքանից հետո ինչպե՞ս չպայքարենք: Ինչո՞ւ Սեֆիլյանին նստացրեցին, իսկ Սուրիկ Խաչատրյանի տղային մարդ սպանելուց հետո ազատ թողեցին, ինչո՞ւ: Ո՞նց չպայքարենք այս ամենի դեմ: Ընտրություններ են կեղծում: Որ մեկն ասեմ»:
Կազդուրվելուց հետո էլի կգնա՞ս Խորենացի փողոց, հարցին Մարինեն գլխով դրական պատասխան տվեց:
Նշենք, որ ըստ առողջապահության նախարարության, Խորենացի փողոցում տեղի ունեցած դեպքերի հետեւանքով Երեւանի բժշկական կազմակերպություններ է դիմել 51 տուժած, նրանցից 29-ը` ոստիկան։ Քիչ առաջ էլ նախարարության տվյալներով, արդեն դուրս են գրվել 40 տուժածներ: Դեռեւս բուժում ստացողների որեւէ մեկի կյանքին, ըստ նախարարության, վտանգ չի սպառնում:
Նելլի ԲԱԲԱՅԱՆ
