Հուլիսի 21-ին Ն.Ս.Օ.Տ.Տ. Գարեգին Բ Ծայրագույն Պատրիարք և Ամենայն Հայոց Կաթողիկոսը Մայր Աթոռ Սուրբ Էջմիածնում ընդունեց Անտիոքի Ուղղափառ Եկեղեցու Զահլեի միտրոպոլիտ Անտոնիոս Ալսորուն ուղեկցությամբ Հայաստանի Հանրապետությունում Լիբանանի արտակարգ և լիազոր դեսպան Ժան Մաքարոնի և բարերար Նիկոլա Աբոֆայիսայի:
Հանդիպմանը Նորին Սրբությանը փոխանցելով Անտիոքի Ուղղափառ Եկեղեցու պետ Հովհաննես Ժ-ի եղբայրական ողջույններն ու բարեմաղթանքները` Զահլեի միտրոպոլիտն իր ուրախությունը հայտնեց առաջինը պետականորեն քրիստոնեությունն ընդունած օրհնյալ երկիր այցելության առնչությամբ: Նա նաև փաստեց երկու Եկեղեցիների միջեկեղեցական սերտ կապերն ու պատմական աղերսները: Խոսքի ավարտին միտրոպոլիտը խնդրեց Նորին Սրբության զորակցությունը Ուղղափառ Եկեղեցու բարերար մի զավակի կողմից Հայաստանում կառուցվելիք մատրան համար: Այս առիթով Նորին Սրբությունը մատրան կառուցման ազնիվ նախաձեռնության համար Հայրապետական իր գնահատանքը հայտնեց բարերարին:
Ամենայն Հայոց Կաթողիկոսը, բերելով իր օրհնությունը, վերստին հայտնեց իր եբայրական սերն ու ջերմ զգացումները հանդեպ Անտիոքի Ուղղափառ Եկեղեցու Պետը, ինչպես նաև երախտագետ սրտով վերհիշեց Լիբանանի և Արաբական պետությունների այն հոգածու վերաբերմունքը, որ ցուցաբերել են հայ ժողովրդի նկատմամբ` հնարավորություն ընձեռելով Մեծ Եղեռնից մազապուրծ հայերին վերակառուցելու իրենց ազգային-հոգևոր կյանքը:
Հանդիպմանը ներկա էր նաև Հայաստանի Աստվածաշնչային ընկերության գլխավոր քարտուղար Գերաշնորհ Տ. Եզնիկ արքեպիսկոպոս Պետրոսյանը:
Կարդացեք նաև
Մայր Աթոռ Սուրբ Էջմիածին
