Երևանի Էրեբունի համայնքում տեղակայված ՀՀ ոստիկանության ՊՊԾ գնդի գրավման հետևանքով տեղի ունեցող իրադարձություններն արդեն մի քանի օր շարունակ միջազգային ԶԼՄ-ների ուշադրության կենտրոնում են։
Հայաստանի մայրաքաղաքում կատարվող իրադարձությունները հատկապես լայն արձագանք են գտնում ռուսական ԶԼՄ-ներում։ Ռուսական «ՏԱՍՍ» լրատվական գործակալությունը տեղեկացնում է հուլիսի 20-ի երեկոյան ոստիկանների և ցուցարարների միջև բախումների մասին։ Լրատվական գործակալությունը ուշադրություն է դարձնում այն հանգամանքի վրա, որ ՀՀ նախագահն ու հանրապետության իշխանությունները որևէ կերպ չեն արձագանքում կատարվող իրադարձություններին։
Արևմտյան լրատվամիջոցների էջերում նույնպես հայտնվել է հուլիսի 20-ին տեղի ունեցած բախումները։ Fox news-ի անդրադարձում նշվում է, որ ցուցարարներին հանդարտեցնելու նպատակով ոստիկանությունն արցունքաբեր գազ և այլ միջոցներ է կիրառել։ Բախումների հետևանքով կան բազմաթիվ բերման ենթարկվածներ։
Հանրահայտ Al jazeera-ն նշում է, որ ցուցարարները քարեր են նետել ոստիկանների ուղղությամբ հուլիսի 20-ի երեկոյան տեղի ունեցած բախումների ժամանակ։ Նշվում է նաև, որ ՊՊԾ գունդը գրաված անձինք շարունակում են պատանդ պահել ՀՀ փոխոստիկանապետ Վարդան Եղիազարյանին և Երևանի փոխոստիկանապետ Վալերի Օսիպյանին։
Կարդացեք նաև
Մեկ այլ լրատվամիջոց՝ «Եվրոնյուզը», արձանագրում է, որ հուլիսի 20-ին ցուցարարները փորձել են ճեղքել ոստիկանական պատնեշը, որի արդյունքում բախում է եղել, իսկ ոստիկանությունը կիրառել է արցունքաբեր գազ և այլ միջոցներ։
