«Համաձայն եմ կոչի հետ` մեզ հանգստություն է պետք, ոչ թե արյունահեղություն: Սոսկալի բան է արյունահեղությունը, երբ նույն ազգի ներկայացուցիչների միջեւ է կատարվում: Երեւի իշխանություններին ոչ թե պետք է հորդորենք, այլ անենք հնարավորը, որ չլինի արյունահեղություն»,-այսօր «Հենարան» մամուլի ակումբում անդրադառնալով մի խումբ մտավորականների` «Հիմնադիր Խորհրդարանի» կալանավորված անդամ, Շուշիի առանձնակի գումարտակի հրամանատար Ժիրայր Սեֆիլյանին ուղղված կոչին` ասաց ՀՀ ճարտարապետների միության նախագահ Մկրտիչ Մինասյանը:
Նա հարցադրում արեց` մի քանի օր է` ինչո՞ւ երկրի ղեկավարությունը չի խոսում. «Ինչո՞ւ իշխանության առաջին դեմքերից մեկը չի ասում` «ժողովուրդ, հանգիստ եղեք»: Ժողովուրդը մեծի ձայնն է ուզում լսել, թե չէ մենք կարող ենք խոսել եւ ասել, թե ինչ ենք մտածում: Ղեկավարի խոսք է պետք, որ ժողովուրդը վստահություն ունենա, առաջին դեմքից ստանա կարեւոր տեղեկատվություն: Եթե չի ստանում, ասեկոսեների վրա է հիմնվում: Մենք քիչ ժողովուրդ ենք մնացել` մեզ հետ պարզ պետք է խոսել»:
Անդրադառնալով Խորենացի փողոցում ցուցարարների հավաքներին` Մինասյանը նկատեց, որ եթե խնդիր կա` գերատեսչությունները պետք է դրանք լուծեն, որպեսզի ժողովուրդը չհասնի ծայրահեղ զայրույթի. «Նկատի ունենք նաեւ իշխանություններին. նրանք նույնպես պետք է քայլ անեն, որպեսզի ծայրահեղ վիճակի մեջ չընկնենք: Բազմաթիվ չլուծված հարցեր կան, բայց դրանք զենքով լուծելը այլ հարթություն է մեզ տեղափոխում»:
Կարդացեք նաև
Ճարտարապետների միության ղեկավարը նաեւ կարծիք հայտնեց, որ «Սասնա ծռեր» զինված խմբի եւ իրավապահների միջեւ բանակցությունները գուցե ընթանում են նրա համար, որ իշխանություններն ինչ-ինչ խնդիրների շուրջ փորձում են երաշխիքներ առաջադրել:
Առաջիկայում ստեղծված իրավիճակի շուրջ ՀՀ ճարտարապետների միությունը եւս կոչով հանդես կգա:
Լուիզա ՍՈՒՔԻԱՍՅԱՆ
