Ոստիկանությունն այսօր վաղ առավոտյան տասնյակ ցուցարարներ է բերման ենթարկել: Բերման ենթարկվածների շարքում են նաեւ Քաղաքացիական պայմանագիր կուսակցության անդամները:
Կուսակցության նախագահ Արայիկ Հարությունյանը «Ֆեյսբուք» սոցիալական ցանցում գրառում է կատարել .
«Ժողովուրդ ջան, արդեն Կուսակցության գրասենյակում եմ՝ ՊՊԾ գունդի մոտից բերման ենթարկվելուց հետո։ Մի քիչ վնասվածքներ կան, բայց էդ հեչ, դուխներդ տեղը ։) Հոդվածս՝ 316-ի առաջին մաս»:
Aravot.am-ին չհաջողվեց կապվել պարոն Հարությունյանի հետ, փոխարենը՝ զրուցեցինք Քաղաքացիական պայմանագիր կուսակցության մամուլի խոսնակ Ալեն Սիմոնյանի հետ:
Կարդացեք նաև
«9 հոգու են բերման ենթարկել այս պահին Արայիկ Հարությունյանին բաց են թողել, հուսամ, որ մոտակա ժամերի ընթացքում մնացած 8-ին էլ բաց կթողնեն: Տարբեր տեղեր են տարել, մանրամասն այս պահին տեղյակ չեմ, բայց ենթադրում եմ ու նույնիսկ վստահ եմ, որ բաց կթողնեն, որովհետեւ մեր կողմնակիցների կողմից կատարված գործողությունների մեջ որեւէ անօրինական բան չի եղել»,- ասաց նա:
Ալեն Սիմոնյանը մեզ հայտնեց, որ բերման ենթարկվածների կարգավիճակի մասին դեռ որեւէ տեղեկություն չունի. «Ես պնդում եմ, որ չի կարող լինել, որովհետեւ մեր գործողությունների մեջ որեւէ անօրինական բան չի եղել»:
Ամի ՉԻՉԱԿՅԱՆ
