Այս պահին Խորենացի փողոցում՝ ոստիկանական բարիկադների հետեւում են Երեւանի ոստիկանապետ Աշոտ Կարապետյանը եւ ոստիկանական զորքերի հրամանատար Լեւոն Երանոսյանը: Նրանք զրուցելով շրջում են տարածքում:
Նշենք, որ Խորենացի փողոցում հավաքվել են մի քանի տասնյակ քաղաքացիներ:
Քաղաքացիների թվի ավելացմանը զուգահեռ, Խորենացի փողոցում ավելանում է նաեւ ոստիկանների թիվը: Նկատենք, որ ժամը 18.00-ից սկսած այս փողոցում արդեն 3-րդ օրն է ավելի մեծ թվով մարդիկ են հավաքվում, որոնք կոչ են անում թե իրավապահ մարմիններին, եւ թե «Սասնա Ծռեր» խմբի անդամներին խուսափել արունահեղությունից:
Կարդացեք նաև
Քիչ առաջ «Հիմնադիր Խորհրդարանի» համակիրներից Վահրամ Պետրոսյանը հենց Խորենացի փողոցում ազգային անվտանգության ծառայությունից ծանուցում ստացավ ներկայանալ ԱԱԾ, ընդ որում, նա պետք է ներկայանար ժամը 18.00-ին, սակայն ծանուցումն ավելի ուշ էր ստացել: Պետրոսյանն ասաց, որ մոտ 30 րոպե առաջ իրեն հեռախոսով էլ տեղեկացրել էին ներկայանալ ԱԱԾ: Վահրամ Պետրոսյանը բարձրախոսով հայտարարեց ծանուցագիր ստանալու մասին:
Խորենացի փողոցում որոշ քաղաքացիներ անընդհատ փորձում են հրահրել ոստիկաններին, որպեսզի վեճի բռնվեն, սակայն ոստիկաներն անդրդվելի են:
«Հիմնադիր Խորհրդարանի» համակիրները կոչ արեցին մեկ րոպե լռությամբ հարգել սպանված ոստիկան Արթուր Վանոյանի ընտանիքի վիշտը եւ քաղաքացիներին էլ հորդորեցին իրենց որդիներին հանել հանցավոր ռեժիմի թակարդից եւ միանալ իրենց պայքարին:
Այս պահին նկատվում է ոստիկանական ուժերի ավելացում:
Լուսինե ԲՈՒԴԱՂՅԱՆ
