ԱԺ պատգամավորներ Նաիրա Զոհրաբյանը եւ Միքայել Մելքումյանը արդեն քանի ժամ է` գտնվում են Խորենացի փողոցում եւ բանակցություններ են ում ոստիկանների հետ, որպեսզի մտնեն արգելափակված տարածք եւ հանդիպեն «Սասնա ծռեր» խմբավորման անդամների հետ, լուծումներ առաջարկեն երկու կողմին: Ոստիկանները նրանց պատասխանեցին, որ թույլտվության պատասխանատվությունը պատկանում է քննչական մարմնին, որին էլ պատրաստվում են պատգամավորները դիմել:
«Մենք ասում ենք՝ եթե կարող ենք ինչ-որ բանով օգնել, իրավիճակի լիցքաթափման համար: Ճիշտ է՝ չեմ ասում, որ կարող ենք, մեզ միանշանակ հաջողվելու է, բայց ցանկացած տարբերակ, ցանկացած հնարավորություն այսօր պետք է փորձել»,-լրագրողների հետ զրույցում ասաց Նաիրա Զոհրաբյանը՝ ավելացնելով. «Այսօր ամենակարեւոր բանը՝ կողմերի միջեւ երկխոսությունն է: Միայն այդ ձեւով է հնարավոր չտանել էլ ավելի էսկալացիայի: Հիմա, եթե իրենք գտնում են, որ դա հնարավոր չի՝ ի՞նչ ասեմ»:
Միքայել Մելքումյանն էլ նորից կրկնեց, որ այս ամենը հետեւանք է երկրում տիրող իրավիճակի եւ մենք պետք է կարողանանք համակարգային լուծումների գնալ՝ ոչ ստանդարտ լուծումների:
Զրույցից հետո պարոն Մելքումյանին մոտեցան մի խումբ քաղաքացիներ եւ առաջարկեցին իրենց տեսակետները: Մարդիկ այնքան էին վրդովվել, որ մոռանալով այս պահի խնդրի մասին, իրենց անձնական խնդիրները՝ կապված պետական մարմինների հետ, ասում էին պատգամավորին եւ առաջարկում իշխանափոխություն. «Իշխանավորներին եք լսում, ոչ թե ժողովրդին: Այդքան դուխ ունե՞ք Սերժի դեմ խոսել»,- ասում էր քաղաքացիներից մեկը:
Կարդացեք նաև
Անուշ ՄԱԹԵՎՈՍՅԱՆ
