«Վերջին օրերին ոստիկանություն բերման ենթարկված ակտիվիստների թիվն այս պահին ոստիկանությունը չի կարող հայտնել, տվյալները հաշվվում են եւ առաջիկայում կտրվեն բոլոր հարցերի պատասխանները. վստահեցնում է ՀՀ ոստիկանության հասարակայնության հետ կապերի և լրատվության վարչության պետ Աշոտ Ահարոնյանը:
«Նման ծավալի դեպքերի ժամանակ աննախադեպ է նաեւ մեր աշխատանքը, ուստի անհրաժեշտ է որոշակի ժամանակ»,-Ոստիկանության լրատվական կենտրոնում հրավիրված մամուլի ասուլիսից հետո ասաց նա: Լրագրողները խնդրեցին մեկնաբանել երեկ Սարի թաղում քաղաքացիների եւ ոստիկանների միջեւ տեղի ունեցած բախումը` ակնարկելով, որ բնակիչների զայրույթը, փաստորեն, կոմունալ խնդիրների հետ է կապված եղել: Տեղեկություններ կային, որ արդեն երեք օր է` բնակիչներն էլեկտրականություն եւ գազ չունեն, կա նաեւ ինտերնետ-կապի խնդիր:
«Տեսանյութը դիտել եմ, զազի հարց չեմ տեսել, տեսել եմ քար նետող մարդկանց, բայց ձեռնպահ կմնամ դեպքի մասին խոսելուց, քանի որ ՀՀ քննչական կոմիտեում կա գործ: Գազի եւ ջրի մասին խոսք չկար, տեսանյութում կային հայհոյանք եւ նետվող քարեր, ոստիկաններ եւ քաղաքացիական անձինք»,-ասաց Ահարոնյանը:
Հարցին` ինչու փաստաբաններին թույլ չեն տալիս ոստիկանության զորքերի զորամասում տեսակցել բերման ենթարկված իրենց վստահորդներին, նա այսպես արձագանքեց. «Ընդհանրական դժվար է պատասխանել, կոնկրետ անձի խախտման իրավունքի մասին պետք է խոսել: Իսկ տեսախցիկների ֆիքսած փաստերը կօգտագործվեն»:
Կարդացեք նաև
Զավթված ՊՊԾ գնդի տարածքի` ոստիկանական ամենամեծ զորամասը լինելու տեղեկությունների շուրջ էլ Աշոտ Ահարոնյանն ասաց. «Տարածքների մասին ցուցանիշներ չունեմ ձեռքիս տակ»:
Ինչ վերաբերում է «Սասնա ծռերի» հայտարարությանը, թե ՊՊԾ գնդում ավելի շատ զենք կա, քան սահմանին, Ահարոնյանի խոսքով. «Օրենսդրության մեջ գրված են այն զինատեսակները, որոնք կան ոստիկանության տրամադրության տակ: Դրանցից ավել չեն կարող լինել»:
Ահարոնյանը նաեւ վստահեցրեց, որ ՀՀ փոխոստիկանապետ Հունան Պողոսյանն առաջիկայում եւս կհանդիպի լրագրողների հետ:
Ինչ վերաբերում է իրավապահների եւ «Սասնա ծռերի» միջեւ բանակցություններին, Ահարոնյանի խոսքով` դրանք ընթանում են:
Լուիզա ՍՈՒՔԻԱՍՅԱՆ
