Փաստաբան Տիգրան Եգորյանը համարում է, որ ոստիկան Արթուր Վանոյանի մահվան հանգամանքի շոշափումը եւ շահարկումն անթույլատրելի է, քանի որ իրավական գնահատականի լուրջ խնդիր ունի: Այս մասին նա ասաց հուլիսի 20-ին «Մեդիա կենտրոնում» լրագրողների հետ հանդիպման ընթացքում:
«Թե՛ մահվան հանգամանքի, թե՛ դրան նախորդող հանգամանքների վերաբերյալ իրավական փաստերը այս պահի դրությամբ բավարար չեն դատողություններ անելու համար: Այսօրվա դրությամբ անթույլատրելի է որեւէ փաստարկներ բերել, որովհետեւ դրանք կարող են առաջացնել ցանկալի կամ անցանկալի հակափաստարկներ, այլ հետեւանքներ, որոնք որեւէ կերպ այս պահին ստեղծված իրավիճակի խաղաղ հանգուցալուծմանը չեն նպաստելու:
Հետեւաբար՝ դրանք աննպատակահարմար է քննարկել, առավել եւս՝ շահարկել՝ ստեղծելով հաշվեհարդար եւ վրեժխնդիր լինելու տրամադրություններ, պատվախնդրության նկատառումից ելնելով, որոնք, ցավոք, վերջին օրերին ոստիկանության ծառայողները զանգվածաբար սկսեցին դրսեւորել հասարակության անդամների նկատմամբ՝ ձերբակալությունների, բերման ենթարկումների, անմարդկային վերաբերմունքի, նվաստացուցիչ վերաբերմունքի եւ երբեմն խոշտանգումների հասնող դրվագներով»,- ասաց նա:
Տիգրան Եգորյանը համարում է, որ փորձ է կատարվում հոգեբանական նախատրամադրվածություն ստեղծել գրոհի այլընտրանք չունենալու վերաբերյալ, ինչն էլ, ըստ նրա, անթույլատրելի է. «Պետության դրական պարտավորությունն է սպառել խաղաղ հանգուցալուծման բոլոր միջոցները, եւ առանց անհրաժեշտության չդիմել ծայրահեղ միջոցի: Որովհետեւ այդ ծայրահեղ միջոցի արդյունքում, այդ բախման արդյունքում կյանքի եւ առողջությանը հասցված վնասների պատասխանատվությունը կրելու է պետությունը, որքան էլ որ հիմա փորձ է արվում պետության պատասխանատվությունը ի սկզբանե բարդել խմբի տղաների վրա: Այդ պատասխանատվությունը բախման դեպքում միանշանակ կրելու է պետությունը»:
Կարդացեք նաև
Ամի ՉԻՉԱԿՅԱՆ
Լուսանկարը՝ «Մեդիա կենտրոնի»:
