Կես ժամ առաջ Խորենացի փողոցում Աժ պատգամավոր Նիկոլ Փաշինյանը հայտարարեց, որ շրջանցիկ ճանապարհով բարձրացել է Սարի Թաղ` տեսնելու իրավիճակը. «Իսկապես բախում է տեղի ունեցել, ճանապարհին քարի ու բետոնի կտորներ էին թափված, բարիկադի նման բան էր սարքված: Բարիկադից այն կողմ մոտեցա ոստիկաներին` հեռախոսս եւ լիցքավորման սարքը ձեռքիս: Գոռում էի` «ես եմ` Աժ պատգամավոր»… բայց չէին լսում: Ասացին` «ցած դիր եւ վեր բարձրացրած ձեռքերով մոտեցիր»: Ցած դրեցի եւ վեր բարձրացրած ձեռքերով մոտեցա: Նկարագրում եմ, որ հասկանաք լարված վիճակը»:
Այնուհետեւ Փաշինյանը խոսել է ոստիկանների հետ: Ասել են` ցանկանում են հրշեջ մեքենա մոտեցնել, որպեսզի մարեն այրվող անվադողերի կրակը (դրանցով բարիկադ էին սարքել), սակայն ավելորդ լարվածություն չստեղծելու համար չեն դիմել այդ քայլին, քանի որ կրակը վտանգավոր չէ:
Ըստ Փաշինյանի` բնակիչները դժգոհել են` իրենց թաղն առել են շրջափակման մեջ. «Սարի Թաղ մուտք են գործում ոստիկաններին անձնագիրը ցույց տալուց հետո: Դժգոհ են ոստիկանների վերաբերմունքից»:
Թաղի բնակիչները պատգամավորի միջոցով Խորենացի փողոցում հավաքված ակտիվիստներին ուղերձ են փոխանցել. աջակցություն են հայտնում «Սասնա Ծռեր»-ի տղաներին: «Թաղի տղաները վանկարկում էին` «Պավլիկ-Պավլիկ»: Բնակիչները միանում են Սերժ Սարգսյանի հրաժարականի պահանջին»,-հայտնեց Փաշինյանը:
Կարդացեք նաև
Անդրադառնալով բնակիչների եւ իրավապահների միջեւ տեղի ունեցած բախմանը` նա նշեց, որ մեկ ոստիկան գլխի վնասվածք ունի:
Փաշինյանը նաեւ տեղեկացրեց, որ քիչ առաջ զրուցել է Վարուժան Ավետիսյանի հետ, վերջինս ասել է, որ ցերեկը նրանց համար բերել են ջուր եւ ինչ-որ սնունդ. «Սննդի խնդիր իսկապես կա: Հիմա կփորձեմ ոստիկանության ներկայացուցիչների հետ հարցը քննարկել: Եթե համաձայնվեն, ես պատահական տեղից սնունդ կգնեմ…»:
Պատգամավորը միացավ ակտիվիստների` իշխանություններին ուղղված պահանջին՝ հերքել կամ հաստատել` արդյոք պատրաստվո՞ւմ են ռուսական ուժերի ներգրավվածությամբ «գազային հարձակում» իրականացնել ՊՊԾ գնդի տարածքի վրա:
Լուիզա ՍՈՒՔԻԱՍՅԱՆ
