Քիչ առաջ Խորենացի փողոցում Ներսես Գաբրիելյանը, որը լրագրողներին ներկայացավ, որպես անձ, որը «բախտ է ունեցել» շփվել «Սասնա Ծռեր» եւ «Հիմնադիր Խորհրդարանի» անդամների հետ, իսկ ավելի կոնկրետ, պարեկապահակային ծառայության գնդի տարածքը գրավածների հետ՝ հայտարարությամբ հանդես եկավ:
Ներսես Գաբրիելյանն ասաց, որ իրենք տեղեկություն են ստացել, որ «Արմնյուզ» հեռուստաընկերությամբ ցուցադրվել են կադրեր, որտեղ երեւացել է մեկ զրահամեքենա՝ ռազմական գունավորմամբ, եւ ասել են, որ պատրաստվում են գրոհով տարածքը վերցնել. «Այս տեղեկությունը փորձել ենք ճշտել, կապվելով ներսում գտնվող մեկի հետ, ներսից ասել են, որ իրավիճակը հանդարտ է: Մենք ասում ենք՝ եղբայրասպանություն, նոր արյունահեղություններ չլինեն: Ժողովրդի ներկայությունն այստեղ կարեւոր է: Ով որ գա, ոչինչ էլ չանի, միայն ներկայությունն ապահովելով՝ նվազեցնելու է ռիսկը»:
Գաբրիելյանի կարծիքով՝ «Չեմ կարծում, որ առանց ճակատամարտի հանձնվելու են: Իսկ հարձակվող կողմի մոտ զոհերն ավելի շատ են լինելու: Քաղաքական պայքարի դեպքում միջինը գնահատվում է 3- 4 անգամ ավել զոհ հարձակվող կողմի մոտ, քան՝ պաշտպանվողինը: Մենք բացարձակապես կողմ չենք, որ հանուն կոռումպացված իշխանավորների քմահաճույքների պատճառով որեւիցե նոր զոհեր լինեն մեր երկրում»:
Կարդացեք նաև
Ներսես Գաբրիելյանն ասաց, որ իշխանությունը փորձում է վախի մթնոլորտ տարածել, որպեսզի մարդիկ կարողանան գնալ Խորենացի փողոց. «Որտեղ այս կայծը պայթյուն չդառնա իրենց գլխին: Եւ քանի որ մենք տեղեկություններ չունենք ռազմական ուժերի կուտակումների մասին, գրոհի ժամանակ չափից ավելի խտությունը նշանակում է չափից ավելի անարդարացված կորուստներ»:
ՊՊԾ գնդի տարածքի վրա զինված հարձակում գործած անձանց մասին էլ Գաբրիելյանն ասաց. «Այդ մարդիկ անհանգստացած են մեր երկրի ապագայով: Մարդ, որը որդու հետ գնացել է այդ քայլին, ուրեմն գիտակցում է ինչ է անում, եւ սննդի բացակայությունն էլ իրեն չի խեղճացնի»:
Անուշ ՄԱԹԵՎՈՍՅԱՆ
