Անդրեյ Դիմիտրիի Պինչուկինին մեղադրանք է առաջադրվել այն բանի համար, որ նա գտնվելով Վրաստանի Հանրապետության տարածքում, չունենալով պատշաճ փաստաթղթեր, ապօրինի մուտք է գործել Հայաստանի Հանրապետության տարածք, ձեռք է բերել կեղծ անձնագիր, որն օգտագործելով Հայաստանից Վրաստանի տարածքով տարանցիկ մեկնել է Ռուսաստանի Դաշնություն:
Ըստ «Դատալեքս» դատական տեղեկատվական համակարգի՝ Ա. Պինչուկինը կալանավորված է: Նրան մեղադրանք է առաջադրվել ՀՀ քրեական օրենսգրքի 325 հոդվածի 1-ին մասով («Իրավունք վերապահող կամ պատասխանատվությունից ազատող վկայական կամ պաշտոնական այլ փաստաթուղթ կեղծելը՝ կեղծողի կողմից անձամբ կամ այլ անձի կողմից դրանք օգտագործելու կամ իրացնելու նպատակով կամ այդպիսի փաստաթուղթ իրացնելը կամ նույն նպատակներով կեղծ կնիքներ, դրոշմներ, ձեւաթղթեր, տրանսպորտային միջոցների պետհամարանիշներ պատրաստելը կամ իրացնելը, ինչպես նաեւ ակնհայտ կեղծ փաստաթուղթ օգտագործելը»), 329 հոդվածի 1-ին մասով («Առանց սահմանված փաստաթղթերի կամ առանց պատշաճ թույլտվության Հայաստանի Հանրապետության պահպանվող պետական սահմանը հատելը») եւ 34-329 հոդվածի 1-ին մասով («Առանց սահմանված փաստաթղթերի կամ առանց պատշաճ թույլտվության Հայաստանի Հանրապետության պահպանվող պետական սահմանը հատելու փորձը»):
Քրեական գործով մեղադրանքը պաշտպանում է ՀՀ գլխավոր դատախազությունը: Սույն քրեական գործով դատավարությունը Տավուշի մարզի առաջին ատյանի դատարանում կմեկնարկի հուլիսի 27-ին:
Ոսկան ՍԱՐԳՍՅԱՆ
