«Մենք հաճախ պայքարում ենք հետևանքների դեմ՝ փորձելով ճնշել, վերացնել դրանք, բայց երբ պատճառները չենք վերացնում, սպառնալիքը միշտ մնում է, մանավանդ որ ագրեսիվությունը մեր հասարակության մեջ ահագնացող տեմպերով դնում է իր արմատները»,- «Տեսակետ» մամուլի ակումբում այսօր լրագրողների հետ հանդիպման ժամանակ նկատեց Հովհաննես Թումանյանի անվան պետական տիկնիկային թատրոնի գեղարվեստական ղեկավար Ռուբեն Բաբայանը՝ անդրադառնալով հուլիսի 17-ին «Սասնա ծռեր» խմբի կողմից ոստիկանության պարեկապահակային ծառայության գնդի վրա հարձակմանը:
Արվեստագետը չի կարող արդարացնել այս արարքը, քանի որ արդյունքում մարդ է սպանվել։
«Մարդասպանությունը հարց չի լուծում,- ընդգծեց նա.- ամենապայծառ, ամենահրաշալի գաղափարն անգամ արժեք չունի, եթե մարդ պետք է զոհվի: Մարդկանց առաջ տանողը գաղափարները չեն, այլ միջոցները, որոնցով իրականացվում են այդ գաղափարները: Եթե իրագործվում են դաժան, արյան միջոցով, գաղափարը սնանկանում է»:
Բաբայանի համոզմամբ՝ այստեղ շատ անելիքներ ունի իշխանությունը. «Չի կարելի բերել եզրին հասցնել: Երբ կատվին անկյուն ես տանում, հետո չպետք է զարմանաս, որ նա ցատկում է ու ճանկռում… Պետք է թողնես օրինական, ժողովրդավարական ձևով երկրում բարեփոխումներ կատարվեն, իշխանափոխություն լինի, որպեսզի որևէ մեկն իրավունք չունենա ասելու՝ բոլոր ճանապարհները փակ են, բա ի՞նչ անենք»:
Կարդացեք նաև
Շատ բաներ էլ հասարակությունից են կախված. «Հասարակությունը չպետք է ծափերով ողջունի այն գործելաոճը, որը հանգեցնում է մարդկային կյանքի կորստի: Անընդունելի է, որ այս պարագայում որոշ մարդիկ արդարացնում են տեղի ունեցած մարդասպանությունը: Այն ատելությունը, որ սերմանում ենք մեր սրտերում, ծայրահեղություն է ծնում, մեր դեմ է գալիս: Սրանով քայլ առ քայլ գնում ենք դեպի քաղաքացիական պատերազմ»,- կարծում է Բաբայանը:
«Կան արարքներ, որոնք աշխարհը գնահատում է բացասական, սակայն հայերը գնահատում են դրական, հայրենասիրական»,- նկատեց Հայաստանի գրողների միության նախագահ Էդվարդ Միլիտոնյանը:
«Որոշ հարցերի, հատկապես ահաբեկչությանը, աշխարհը նույն գնահատականն ունի ու չի ընկալի, եթե ասենք՝ մենք որևէ քաղաքական կամ հայրենասիրական գործ պետք է ահաբեկչությամբ լուծենք, չի ընկալի, եթե ասենք՝ մերը հայրենասիրական, գաղափարախոսական ահաբեկչություն է: Ագրեսիաներն արդարացնելը մեծ չարիք է մեր ապագայի համար»,- ընդգծեց Միլիտոնյանը և հորդորեց զինված խմբի անդամներին հանձնել զենքերը՝ չվտանգելով իրենց և ուրիշների կյանքը:
Սիրանուշ ՀԱՅՐԱՊԵՏՅԱՆ
