Էրեբունի վարչական շրջանում գտնվող ՊՊԾ գնդի տարածքում, որտեղ արդեն երկրորդ օրն է «Հիմնադիր Խորհրդարանի» զինված մի քանի անդամներ պատանդ են վերցրել գնդի ոստիկաններից քանիսին, սննդի խնդիր է առաջացել: Այս մասին հայտնել էր «Հիմնադիր Խորհրդարանի» մամլո խոսնակը, որը սակայն հայտնել է, որ ավելի ուշ մի փոքր սնունդ ոստիկանների միջոցով բերվել է եւ պատանդ ոստիկանների հետ սնվել են:
Մինչ իրավիճակն անկախատեսելի է, այնտեղ գտնվողների վիճակը մասնագետների համար կանխատեսելի է:
Aravot.am-ը սննդաբան-էնդոկրինոլոգ Հասմիկ Աբովյանից հետաքրքրվեց, թե առանց նորմալ սնվելու, ամռան այս տապին, մարդիկ որքա՞ն կարող են դիմանալ:
«Նայած` ով: Առանց ջրի ամենաշատը 2-3 օր: Մարդիկ կան, որ առանց սնվելու
մինչեւ 40 օր էլ կարող են դիմանալ: Ցրտի ժամանակ ավելի դժվար է քաղցած մնալը քան` ամռանը: Բայց ամռանն էլ ավելի շատ է ջուր պետք, եթե օրգանիզմի համար անհրաժեշտ քանակությամբ ջուրը չստանան, ապա առողջական խնդիրներ կունենան»,-ասաց Հասմիկ Աբովյանը: Սակայն, ըստ բժշկի, ամեն ինչ կախված է մարդու առողջական վիճակից, եթե շատ առողջ է ավելի երկար կդիմանա, եթե վատառողջ է` երիկամների, սրտանոթային խնդիրներ ունի, ավելի շուտ կսկսի ինքնազգացողությունը վատանալ:
Հիշեցնենք, որ «Հիմնադիր Խորհրդարանի» մի քանի անդամներ երեկ լուսադեմին զինված հարձակում են գործել Էրեբունի վարչական շրջանում գտնվող ՊՊԾ գնդի վրա։
Այս պահին նրանց ձեռքին, որպես պատանդ մնացել են 4 ոստիկան, որոնց թվում է նաեւ Երեւանի փոխոստիկանապետ Վալերի Օսիպյանը:
Կարդացեք նաև
Լուսինե ԲՈՒԴԱՂՅԱՆ
