Ինչպես ավելի վաղ հայտնել էինք, երեկ Երեւանի տարբեր վարչական շրջաններից ոստիկանները բերման էին ենթարկում «Հիմնադիր Խորհրդարանի», «Ոչ թալանին» եւ այլ քաղաքացիական նախաձեռնությունների ակտիվիստներին: «Պոստ Սկրիպտում» մամուլի ակումբում այսօր «Ընդդեմ իրավական կամայականության» հ/կ իրավապաշտպան կառույցի փաստաբան Արա Կարագյոզյանը մասնավորապես խոսեց «Ոչ թալանին» շարժման ակտիվիստ Վաղինակ Շուշանյանի հետ պատահածի մասին: Հիշեցնենք` Շուշանյանը մեզ հետ զրույցում պատմել էր, որ ոստիկանական բաժանմունքում իրեն ծեծել են:
«Ինձ թույլ չտվեցին ներս մտնել, ասացին` «կճշտենք»: Երկու ժամ հետո ասացին, թե Վաղինակը չի ուզում փաստաբան: Պնդեցի, որ նա զանգի իրավունք ունի եւ հեռախոսազանգով տեղեկացա, որ նա ուզում է փաստաբան: Միեւնույն է, դուռը փակեցին ինձ վրա: Առանց իրավական հիմք նշվելու, ինը ժամ նա ապօրինի պահվել է ոստիկանական բաժնում, ինչի առթիվ ես հաղորդում եմ տվել` նաեւ իմ փաստաբանական գործունեությունը խոչընդոտելու եւ Վաղինակին ծեծի ենթարկելու համար»,-պատմեց Արա Կարագյոզյանը:
Նա տեղեկացրեց, որ դեպքի օրը պարբերաբար զանգահարել է Մարդու իրավունքների պաշտպանին. «Վերջինիս աշխատակազմը ներսում էր: Ասում էին` «փորձում ենք բանակցել, որ ձեզ ներս թողնեն», բայց չորս ժամ անցավ ու ինձ ներս չթողեցին: Գիշերը մեկից հետո Վաղինակը դուրս եկավ ծեծված վիճակում` կապտուկներով, աչքն ամբողջությամբ արյան մեջ էր: Պնդեց, որ իրեն ծեծել են»: Ըստ փաստաբանի` Շուշանյանին չեն ասել, թե ինչու են բերման ենթարկում. նրան առանց պատճառի ծեծել են:
Կարագյոզյանը տարօրինակ համարեց այն փաստը, որ բերման ենթարկվածներին տանում էին ոստիկանության զորքերի զորամաս. «100-ից ավելի բերման ենթարկված կար ոստիկանության զորքերում: Նաեւ երեք անչափահաս տղաներ կային` առանց ծնողի ներկայության, ինչն օրենքի խախտում է»:
Կարդացեք նաև
Փաստաբանը նաեւ նկատեց, որ ոստիկանն իրավունք չունի քաղաքացուն բանավոր «հրավիրել» բաժանմունք. «Եթե բաժին ես կանչում, անձը պետք է ունենա կասկածյալի կամ մեղադրյալի կարգավիճակ»:
Նկատենք, որ երեկ Ազատության հրապարակում ոստիկանները քաղաքացիներին մոտենում էին «Մենք Ձեզ հրավիրում ենք մեքենա» խոսքերով, իսկ քաղաքացիների հրաժարվելուն հետեւում էր ուժի գործադրմամբ ոստիկանական մեքենա նստելը:
Լուիզա ՍՈՒՔԻԱՍՅԱՆ
