«Ոստիկաններն ինձ հետ բերման ենթարկեցին 15- 20 հոգու: Սկզբում հարգալից մոտեցան, ես նորմալ քայլերով գնացի իրենց մեքենան, հասա մեքենայի մոտ, միանգամից՝ հեռախոսդ հանի՛ ու բոքսեցին: Մեկը՝ մեքենայի մյուս կողմից, մեկը՝ դեմից: Մեկը հարվածում էր փորիս, մեկը՝ մեջքիս, մեկը՝ գլխիս, մեկը՝ քթիս: Ես նոկաուտի մեջ էի, գոռում էի՝ շտապօգնություն կանչեք»,- մեզ հետ զրույցում Շահեն Հարությունյանը պատմեց, թե ինչպես են ոստիկաններն իրեն ծեծի ենթարկել:
Նա ասաց, որ գլխին այնպես են հարվածել, որ 2013-ի նոյեմբերի 5-ի Շանթ Հարությունյանին բերման ենթարկելու դեպքերի ժամանակ Շանթի ստացած գլխի վնասվածքը թարմացել է. «Այն ժամանակ էլ ուժեղ գլխիս էին խփել, ուռել էր գլուխս, ուժեղ գլխացավեր էի ունենում: Ականջիս հետեւի ոսկորն է, հենց խփեցին, գոռում էի՝ նույն տեղիս մի խփեք, արդեն նոկաուտի մեջ էի»:
Շահեն Հարությունյանն ասաց, որ ոստիկանական բաժնում իրեն պահել են 5 ժամ, սկզբում առգրավել են հեռախոսը, փաթեթավորել, որ ուղարկեն քննչական, հետո հետ են վերադարձրել՝ ստացականով. «Մեղադրանք էին առաջ քաշում՝ զենք-զինամթերք պահելու կասկածանքով, հանցավոր խմբին աջակցություն: Հարց տվեցի՝ ո՞ւմ եմ աջակցել, ասեցին՝ դու լավ հասկանում ես, որ խմբի մասին է խոսքը»:
Նա ասաց, որ իր ռոմանտիկ մտածելակերպով գտնում է, որ սա բացառիկ դեպք է, բայց չի հավատում, որ ամբողջ ժողովուրդը դուրս կգա փողոց:
Կարդացեք նաև
Հռիփսիմե ՋԵԲԵՋՅԱՆ
