Ինչպես տեղեկացրել ենք, Գյումրու ոստիկանության «Կումայրի» բաժնի աշխատակիցները, վաղ առավոտյան մտնելով անցած տարի հոսանքի թանկացման դեմ պայքարող «Էլեկտրիկ Գյումրիի» ակտիվիստների տները, նրանց հրավիրել էին ոստիկանություն: Ակտիվիստներից մի քանիսը եղել էին ոստիկանությունում, որտեղ զրույցը շատ կարճ էր տևել, քանի որ, ըստ ակտիվիստների, իրենք զրուցելու թեմա չունեին:
Վաղ առավոտից ոստիկանության «Կումայրի» բաժնում է պահվում «Ժառանգություն» կուսակցության անդամ Եղիշե Շարյանը: Եղիշեի եղբայրը, որը նրան է սպասում ոստիկանության շենքի դիմաց, պատմեց, որ ոստիկանները վաղ առավոտյան մտել են իրենց տուն, իրենք քնած են եղել ու արթնացնելով Եղիշեին բերել են ոստիկանություն:
Ակտիվիստներն ահազանգել էին մարդու իրավունքների պաշտպանին, քանի որ Եղիշեին ոչ միայն տաս ժամից ավել ապօրինաբար պահում են ոստիկանությունում, այլ ստում են, թե նրան ազատ են արձակել: Մարդու իրավունքների պաշտպանի ներկայացուցիչը բավական երկար սպասելուց հետո ներս մտավ ոստիկանության շենք: Վերջինիս դեռ ազատ չեն արձակել:
Գյումրու ոստիկանության «Կումայրի» բաժին էին բերել նաև Կառնուտ գյուղի էլեկտրիկին՝ Սևակ Խաչատրյանին, ըստ նրա հարազատների, ժամանակին «Նախախորհրդարանի» համակիր է եղել,նրան ոստիկանություն հրավիրելու պատճառն, ամենայն հավանականությամբ, դա է: Վերջինս իր մեքենայով գործերով եկել է Գյումրու էլցանց, ամենայն հավանականությամբ նրան հետապնդել ու ճանապարհից են բերման ենթարկել: Նրա մեքենան կանգնած էր ոստիկանության շենքի մոտ:
Կարդացեք նաև
Գյումրու ոստիկանության «Մուշ» բաժին է տարվել Գյումրու մանկավարժական ինստիտուտի դասախոս Արմեն Ներսիսյանը, որը նույնպես մի կարճ ժամանակ եղել է «Նախախորհրդարանի» համակիրներից: Նշենք, որ նույն բուհի դասախոս, ազգագրագետ Արտաշես Բոյաջյանին նույնպես հրավիրել էին ոստիկանություն, հինգ ժամ պահելուց հետո ազատ արձակել: Վերջինս մեզ հետ զրույցում ասաց, որ տարիներ առաջ ինքը մի անգամ մասնակցել է «Նախախորհրդարանի» ժողովներից մեկին:
Հենց նոր ահազանգ ստացանք, որ «Կումայրի» բաժնի դիմաց ոստիկանները, փակելով փողոցը, սկսել են քաշքշել դրսում սպասող ակտիվիստներին:
Նունե ԱՐԵՎՇԱՏՅԱՆ
