Ուղիղ չորսուկես ժամ է անցել, ինչ Թուրքիայում ռազմական հեղաշրջման փորձ է իրականացվում: Այս ընթացքում Թուրքիայի հարեւանները իրար էին խառնվել: Իրանը, Վրաստանը եւ Բուլղարիան փակել էին սահմանները Թուրքիայի հետ: Հունաստանի, Կիպրոսի, Իրանի եւ Վրաստանի իշխանությունները հայտարարել են, որ անվտանգության խորհրդի հրատապ նիստեր են անցկացնելու: Հունաստանը անգամ ուժեղացված ռազմական ռեժիմի անցնելու մասին հայտարարություն արեց: ԱՄՆ-ի եւ Ռուսաստանի, ինչպես նաեւ բազմաթիվ այլ երկրների պաշտոնյաները արագ հայտարարություն տարածեցին, որով կոչ արեցին Թուրքիայում գտնվող իրենց քաղաքացիներին՝ զգուշանալ, տանից դուրս չգալ եւ այլն…
Հայաստանը, ինչպես հայտնի է, նույնպես Թուրքիայի հարեւանն է: Թուրքիայում, ինչպես հայտնի է, հազարավոր ՀՀ քաղաքացիներ են ապրում: Բայց Հայաստանում, ինչպես հայտնի է, իշխանությունները ոչ մի բանից չեն անհանգստանում, քանի դեռ դա անմիջականորեն չի առնչվում իրենց աթոռին: Չորս ժամվա ընթացքում՝ ոչ մի հայտարարություն: Ոչ մի պաշտոնական տեղեկատվություն ոչ մի պաշտոնական աղբյուրից:
Մեր իշխանությունները կամ հետաքրքրված չեն նրանով, թե ինչ է կատարվում մեր ոխերիմ հարեւանի մոտ, կամ խիստ գաղտնի են պահում իրենց հետաքրքրվածությունը, այնքան գաղտնի, որ անգամ մի թեթեւ կոչ չեն անում սեփական քաղաքացիներին՝ զգուշանալ, տանից դուրս չգալ եւ այլն: Կամ պարզապես՝ մի քիչ շուտ են գնացել քնելու, բանից անտեղյակ են:
Մելանյա ԲԱՐՍԵՂՅԱՆ
Կարդացեք նաև
Հետաքրքրական թատրօն էր…
…թատրոն
Իսկ ինչի մենք կառավարություն ունենք?