Հուլիսի 15-ին տեղի ունեցավ ՀՀ ոստիկանության կոլեգիայի նիստը, որի ընթացքում ամփոփվեցին 2016 թվականի առաջին կիսամյակում ոստիկանության ծառայությունների ու ստորաբաժանումների օպերատիվ-ծառայողական գործունեության արդյունքները:
Նիստը վարում էր ոստիկանության պետ, գեներալ-լեյտենանտ Վլադիմիր Գասպարյանը:
ՀՀ ոստիկանության ծառայությունների և տարածքային մարմինների 2016թ. առաջին կիսամյակի օպերատիվ-ծառայողական գործունեության արդյունքների մասին հաշվետու զեկույցով հանդես եկավ ոստիկանության պետի առաջին տեղակալ, ոստիկանության գեներալ-լեյտենանտ Հունան Պողոսյանը:
Նշվեց, որ հանրապետությունում գրանցված հանցագործությունների ընդհանուր թվաքանակը, գլխավորապես պայմանավորված ՀՀ քր.օր-ի 327 հոդվածով նախատեսված դեպքերը ՀՀ ոստիկանության ինֆորմացիոն կենտրոնում 2016թ. հունվարի 1-ից հաշվառելու հանգամանքով, աճել է 12,6%-ով կամ 1078 դեպքով: Ընդ որում, աճի երկու երրորդը կազմում են հենց հիշյալ դեպքերը:
Կարդացեք նաև
Միևնույն ժամանակ, աճել է հանցագործությունների բացահայտման արդյունավետությունը՝ 1,8%-ով, ծանր հանցագործություններով՝ 5,9%-ով, իսկ առանձնապես ծանր հանցագործություններով՝ 9,1%-ով:
Կիսամյակի ընթացքում արձանագրված 39 սպանության դեպքերից բացահայտվել է 69,2%, ինչը 19,2%-ով բարձր է նախորդ տարվա նույն ժամանակահատվածի համեմատ, իսկ սպանության փորձի 17 դեպքերի բացահայտումը կազմել է 100%: Հարկ է նշել, որ չբացահայտված սպանությունների 41,7%-ն անհայտ կորչելու դեպքեր են:
Բնակարանային գողության դեպքերի բացահայտումն աճել է 8,3%-ով, ավազակության դեպքերինը՝ 27,5, կողոպուտինը՝ 11,8%-ով:
Աճ է արձանագրվել նաև թմրամիջոցների ապօրինի շրջանառության դեպքերի բացահայտման ուղղությամբ՝ 3,1%:
Ձեռնարկված միջոցառումների արդյունքում հաշվետու ժամանակահատվածում առգրավվել և բացատրական աշխատանքների շնորհիվ կամավոր հանձնվել է 409 միավոր հրազեն: 2,3%-ով աճել է նաև զենքի, ռազմամթերքի ապօրինի շրջանառության դեպքերի հայտնաբերման թիվը:
Հաշվետու ժամանակահատվածում 14,8%-ով նվազել է խմբերի, 19 դեպքով՝ անչափահասների կողմից կատարված հանցագործությունների թիվը:
Զգալիորեն աճել է նախկին տարիներին կասեցված քրեական գործերով հանցագործությունների բացահայտման աշխատանքների արդյունավետությունը: Բացահայտված հանցագործությունների թիվն աճել է 149-ով (372-521): Գրեթե կրկնակի աճել է հանցագործություն կատարած անձի ինքնությունը պարզված չլինելու պատճառաբանությամբ կասեցված քրեական գործերով բացահայտված հանցագործությունների թիվը (37-71):
Ճանապարհային երթևեկության անվտանգության ապահովմանն ու ճանապարհատրանսպորտային պատահարների նախականխմանը միտված միջոցառումների արդյունքում հանրապետության տարածքում արձանագրված ճանապարհատրանսպորտային պատահարների քանակը նվազել է 73-ով, զոհերի թիվը՝ 29-ով, վիրավորներինը՝ 116-ով:
Վլադիմիր Գասպարյանը կարևորեց անչափահասների հետ տարվող աշխատանքը, անդրադարձավ բնակարանային գողության դեպքերի բացահայտման առանձնահատկություններին և որպես ոստիկանության արդյունավետ գործունեության գրավական ընդգծեց ստորաբաժանումների փոխգործակցության անհրաժեշտությունը:
Ոստիկանության պետը գործունեության առանցքային ուղղությունների շարքում առանձնացրեց հետախուզվողների հայտնաբերմանն ուղղված աշխատանքը՝ այն դիտելով և՛ որպես հանցավորության արդյունավետ հակազդման, և ոստիկանության հանդեպ հանրային վստահության ամրապնդման նախադրյալ:
Վլադիմիր Գասպարյանը դրական գնահատեց բարեփոխումների գործընթացի արդյունքները Ոստիկանության զորքերում և կարևորեց անձնակազմի պատվախնդիր ու պրոֆեսիոնալ գործելակերպը հասարակական կարգի և անվտանգության ապահովման գործում:
Կոլեգիայի նիստում հաշվետու զեկույցներով հանդես եկան ոստիկանության մարզային վարչությունների պետերը:
Ոստիկանության պետն անդրադարձավ տեղերում հանցավորության կառուցվածքի և դրա հակազդման առանձնահատկություններին ու կարևորեց անձնակազմերի պատրաստականության բարձրացման անհրաժեշտությունը:
Նիստի ավարտին Վլադիմիր Գասպարյանը մասնակիցների ուշադրությունը հրավիրեց հանրությանը ծառայություն մատուցող և անմիջաբար քաղաքացիների հետ աշխատող ստորաբաժանումների գործունեությանը:
Ոստիկանության պետը ճանապարհային ոստիկանության և անձնագրային ու վիզաների վարչության, համայնքային ոստիկանության ղեկավարներից պահանջեց բարձրացնել ծառայողների պատասխանատվության աստիճանը, քաղաքացու հետ շփման որակը, ուշադրություն դարձնել ոստիկանների պահվածքին, արտաքինին, հաղորդակցության կարողություններին:
Ամփոփելով նիստը՝ Վլադիմիր Գասպարյանը համոզմունք հայտնեց, որ առաջին կիսամյակում արձանագրված աշխատանքային արդյունավետությունը կպահպանվի, և ոստիկանությունը տարին կամփոփի՝ լիարժեք իրականացնելով բարեփոխումների ծրագրով նախատեսված բոլոր խնդիրները:
Կոլեգիայի նիստի ավարտին արվեցին մի շարք կադրային փոփոխություններ և տրվեցին կոնկրետ հրահանգներ ու հանձնարարականներ:
ՀՀ ոստիկանություն
