«Ի՞նչ է նշանակում կարգավիճակ տարածքների դիմաց, իմը իմի դիմա՞ց»,- հուլիսի 15-ին «Անդրադարձ» մամուլի ակումբում լրագրողների հետ հանդիպման ընթացքում ասաց «Ընդդեմ իրավական կամայականության» հասարակական կազմակերպության գործադիր տնօրեն Լարիսա Ալավերդյանը:
Նա համարում է, որ բանակցային սեղանի վրա պետք է հստակ դրվի հարցը, թե արդյոք Ադրբեջանը իրավունք ունի Արցախի այսօրվա տարածքների եւ Նախիջեւանի նկատմամբ՝ միջազգային իրավունքի տեսակետից. «Այսօր բոլորը աչք են փակում նրա վրա, որ Նախիջեւանը չի կարող պատկանել ժամանակակից Ադրբեջանին: Այդ հարցը պետք է լինի նախապայման: Եթե դու դա բանակցային սեղանին չես դնում, նշանակում է՝ համաձայնում ես այն բոլոր անօրինականությունների հետ, որոնք տեղի են ունեցել Սովետական Միության ժամանակ, որոնց դեմ արցախահայությունը կանգնել է»:
Լարիսա Ալավերդյանը համարում է, որ ժամանակակից Ադրբեջանը հայտարարելով, որ ժողովրդավարական Ադրբեջանի իրավահաջորդն է, առնվազն ինքն իրեն զրկել է թե՛ Նախիջեւանի, թե՛ Արցախի նկատմամբ որեւէ լեգիտիմ պահանջից. «Ես իրենց չեմ ստիպել ասել, որ իրավահաջորդն են այն հանրապետության, իրենք են դա ասել: Բոլոր փորձագետները, որոնք աշխատել են այդ ժամանակ անմիջապես այդ փաթեթը կազմել են եւ դրել են մեր իշխանության դիմաց, չի օգտագործվել եւ որեւէ տող այդքանից»:
Ամի ՉԻՉԱԿՅԱՆ
