Կենտրոնական ընտրական հանձնաժողովի նախագահ (ԿԸՀ) Տիգրան Մուկուչյանը Aravot.am-ի հետ զրույցում հայտնեց, թե այս պահին հնարավոր չէ ասել, որ ՀՀ ԿԸՀ-ն ընտրությունների անցկացման մասնագիտական դասընթացների ևս մեկ փուլ կանցկացնի:
Հիշեցնենք, որ «Քաղաքացիական պայմանագիրն» ավելի վաղ ներկայացրել էր 2017-ի խորհրդարանական ընտրություններին ընդառաջ «6000 վստահված անձ» նախագծի իրագործման մասին ծրագիրը: Կուսակցության անդամները նախատեսել էին 6000 անձի հավաքագրում, դասընթացներ նրանց հետ եւ ընտրությունների օրը հանրապետության շուրջ 2000 տեղամասերում 3-ական վստահված անձի ապահովում: Մինչդեռ ներկայացրել են կուսակցությունից 156 հոգու հայտ:
Այս մասին կուսակցության վարչության նախագահ Արայիկ Հարությունյանը պարզաբանել էր, թե պատճառն այն է, որ ԿԸՀ-ն մեկ փուլով չի անցկացնում այդ դասընթացները:
Մեզ հետ զրույցում պարոն Մուկուչյանը տեղեկացրեց, որ դիմումների ընդունման գործընթացն ավարտվել է, շուտով կսկսեն դասընթացները: Մեր հստակեցմանը՝ հնարավո՞ր է մեկ այլ փուլով ևս կրկին կազմակերպվեն դասընթացներ, պարոն Մուկուչյանն արձագանքեց. «Մենք այս պահին կարող ենք խոսել այն մասին, ինչ ունենք: Այս պահին կա հայտարարված դասընթաց, դասընթացի օրերը հստակ են: Կարող ենք խոսել միայն այս մասին: Եթե լիներ նման հայտարարություն, որ հետո լինելու է դասընթաց, նման եզրահանգման կգայինք, երբ ունենայինք փաստական հանգամանքներ: Այս պահին առկա է մեկ հայտարարություն, որի դիմումները տրվել են, և դասընթացները շուտով կսկսեն»:
Կարդացեք նաև
Տիգրան Մուկուչյանի փոխանցմամբ՝ այս պահին կա ավելի քան 47 հազար դիմում, և այդ դասընթացները ՀՀ բոլոր քաղաքներում կազմակերպվում են: Պարոն Մուկուչյանը նկատեց. «Դասընթացի գրաֆիկը նախապես հայտարարվում է, դասընթացներն անցկացվում են ՀՀ բոլոր քաղաքներում, հավանաբար փուլ ասելով՝ դա են նկատի ունեցել»:
ԿԸՀ նախագահը տեղեկացրեց, որ այս տարվա ընթացքում նախատեսված դասընթացները մինչ տարեվերջ կավարտվեն:
Տաթև ՀԱՐՈՒԹՅՈՒՆՅԱՆ
