ԱԺ էթիկայի հանձնաժողովը analitik.am կայքի հիմնադիր եւ խմբագիր Անի Հովհաննիսյանի պաշտպան Սուսաննա Սարգսյանի բողոքը՝ ընդդեմ ԱԺ «Բարգավաճ Հայաստան» խմբակցության պատգամավոր Տիգրան Ուրիխանյանի ընդունել էր վարույթ:
Բայց քանի որ քրեական գործ է հարուցված եւ նախաքննություն է ընթանում, հանձնաժողովը միաձայն որոշում է կայացրել կասեցնել այն:
Հիշեցնենք, որ պաշտպանը հանձնաժողովին բողոք էր ներկայացրել՝ Տիգրան Ուրիխանյանի որոշ արտահայտությունների հետ կապված. «…Սրանց թիկունքում կենդանաբանական օրգանիզմներ կան, որոնք այս օրերին հիստերիայի մեջ են ընկած, ոստիկանական տպավորություն թողած կայքերով ու ֆեյսբուքյան էջերով… Գործում է այդ խումբը շատ փնթի, հետքեր ու պոչեր են թողել տարբեր տեղեր՝ կյանքում եւ էլեկտրոնային աշխարհում…»:
Այս առնչությամբ Aravot.am-ի հետ զրույցում հանձնաժողովի նախագահ Խոսրով Հարությունյանն ասաց, որ թեեւ Տիգրան Ուրիխանյանի այդ ձեւակերպումները կոնկրետ անձի ուղղված չեն, բայց վարույթ են ընդունել. «Մեր կանոնակարգով որեւէ գործ կամ որեւէ միջադեպ, որի նկատմամբ հարուցվել է քրեական գործ եւ այն գտնվում է իրավապահ մարմինների վարույթում, ապա մենք իրավունք չունենք վարել այդ գործը, կասեցնում ենք: Հետեւաբար մենք որոշում ենք կայացրել ընդունել վարույթ, բայց կասեցնել: Երբ դատարանի որոշումը կլինի, մենք կվերադառնանք այս հարցադրմանը: Երբ պարզվեց, որ այս բողոքը դեռեւս հիմք ունի, մենք կսկսենք մեր վարույթը»:
Կարդացեք նաև
Մեր հարցին՝ այնուամենայնիվ, էթիկայի հանձնաժողովը կարո՞ղ է բողոքը քննել՝ պատգամավորի բառապաշարի կամ այլ առումով, կապ չունի՞՝ դա կոնկրետ անձի՞ է ասվում, թե՞ ընդհանուր՝ Խոսրով Հարությունյանը պատասխանեց. «Եթե դա ուղղված է կոնկրետ Սուսաննա Սարգսյանին, ապա ակնհայտորեն կլիներ պատգամավորական էթիկայի կանոնների խախտում: Բայց դա ուղղված չի Սուսաննա Սարգսյանին: Դա ուղղված է գործընթացի հետեւում կանգնած անձանց, որոնց ոչ ոք չգիտի, որոնք միգուցե կբացահայտվեն այդ նախաքննության արդյունքում: Հետեւաբար, քանի դեռ ընթանում է նախաքննություն, քանի դեռ բացահայտված չի ում է ուղղված այդ որակումները, մենք կասեցնում ենք, չենք կարճում»:
Հռիփսիմե ՋԵԲԵՋՅԱՆ
