Ոլորտները մենաշնորհած անձանց անուններն այսօր էլ չհրապարակվեցին: Էկոնոմիկայի նախարար Արծվիկ Մինասյանը, որն այսօր ասուլիս էր հրավիրել 6 ամսվա կտրվածքով 280 ձեռնարկությունում կատարած ուսումնասիրությունները ներկայացնելու եւ լրագրողների հարցերին պատասխանելու, ասաց, որ անուններն էական չեն:
Aravot.am-ի հարցին, թե ցուցակը պատրա՞ստ է, ինչպես որ հայտարարել էիք պաշտոնավարման առաջին օրերին, թե ցուցակ է պատրաստվում եւ ոլորտները մենաշնորհած անձանց անունները մեկ առ մեկ հրապարակվելու է, պարոն Մինասյանն ասաց. «Երբ մենք խոսում ենք ոլորտների մասին, անուններ հրապարակելն անիմաստ է դառնում, որովհետեւ, եթե մենք խոսում ենք ոլորտում գերիշխող դիրքի առկայության մասին, եւ ասում ենք, որ օրենքի համաձայն, թեեւ իրենք մենաշնորհ չեն, բայց ընկալվում է այդպես եւ փաստացի իրենք թելադրում են շուկան, ըստ էության այս ոլորտում գտնվող բոլոր գերիշխող դիրք ունեցող սուբյեկտները, տնտեսական տեսակետից, ըստ էության, դառնում են մենաշնորհային դիրք ունեցողներ»:
Ճշտող հարցին, իսկ անուններ չե՞ք ուզում տալ, Արծվիկ Մինասյանն ասաց` իսկ դուք չգիտե՞ք ովքեր են:
Մանրամասները` տեսանյութում
Կարդացեք նաև
Լրագրողների պնդումներին ի պատասխան, թե հայտարարել էիք, որ անուններ պետք է տաք, պարոն Մինասյանն ասաց, որ իր գլխավոր խնդիրը կառավարությանը համակարգային լուծումներ առաջարկելն է:
Մանրամասները` տեսանյութում
Ինչ վերաբերում է վարչապետի հանձնարարականին մենաշնորհները բացահայտելու մասով, ապա էկոնոմիկայի նախարարն ասաց, որ 15 ապրանքային շուկայում ուսումնասիրություն է կատարվել, այն ուղարկվել է շահագրգիռ գերատեսչություններին եւ արդեն ներկայացվել է կառավարություն: Ըստ պարոն Մինասյանի, առաջիկա օրերին կհրապարակվեն այս ապրանքատեսակների մասով ներմուծման ամբողջ ընթացակարգերը:
Լուսինե ԲՈՒԴԱՂՅԱՆ
