«Ինչպես միշտ, իմ ճանապարհը փակեցին, թե ուր եմ գնում եւ ինչի համար` ոչ մեկը չի հարցնում: Ասում են` «տիկին Գոհար, թույլ չենք կարող տալ»…ինչի՞ համար…ասում են` «մենք ձեր երեխայի գործը գիտենք», բայց ի՞նչ գիտեն: 9 տարի իմ ճանապարհը փակում են»,-Aravot.am-ի հետ զրույցում ասաց նախագահական նստավայրի դիմաց այսօր բողոքի ակցիա իրականացնող որդեկորույս մայրերից Գոհար Սարգսյանը (Կարճաղբյուրի զորամասում զոհված Տիգրան Օհանջանյանի մայրը):
Այսօր հերթական անգամ որդեկորույս մայրերին ոստիկանները թույլ չտվեցին մոտենալ նախագահական նստավայրի դարպասներին: «9 տարի ես բողոքում եմ ու դեռ չգիտեմ որդուս մահվան պատճառը, ես ո՞նց գնամ տունը նստեմ: Ամոթ է, որ հանրապետության նախագահը չի կարողանում ընդունել 5 ծնողի եւ ասի` «տիկին, ինչո՞ւ եք Դուք ամեն օր հայտնվում փողոցում կամ Ձեր խնդիրը ո՞րն է»: Հասկանում եմ` նա շատ լավ գիտի մեր խնդիրը, որովհետեւ այս տարիներին իրավասու մարմինները նրան զեկուցել են այդ մասին»,-դժգոհեց Գոհար Սարգսյանը:
Կարդացեք նաև
Նա ասաց, որ հինգ տարի առաջ նախագահը դարպասներից այն կողմ իրենց խոստացավ, որ նոր զինվորական դատախազն իրավական գնահատական կտա նրանց որդիների քրեական գործերին, բայց մինչ օրս արդյունքը չեն տեսնում. «Հինգ տարի նախագահի` գերագույն գլխավոր հրամանատարի խոսքը փուչիկ է: Թող գոնե դուրս գա ասի, որ իրավապահներն արել են իրենց գործը, իսկ ես այլեւս անելիք չունեմ Բաղրամյան 26-ում կամ փողոցում»:
Գոհար Սարգսյանը նշեց, որ նախորդ բողոքի ժամանակ ոստիկանին հարցրել է` եթե սեւ հագուստով չգա, էլի թույլ չե՞ն տալու առաջանալ. «Ասաց` տիկին Գոհար, Ձեզ ճանաչում են, Ձեր ստվերն էլ եթե այս կողմերում երեւաց, թույլ չեն տալու…: Նախագահն ինձ ասելիք ունի` խաղաղ պայմաններում որդուս սպանել են, բայց ոչ ոք պատասխան չի տվել դրա համար: Իմ երեխային գտել են Հայկազ Բաղմանյանի թիկնապահների սենյակի պատուհանի տակ` սպանված եւ խոշտանգված վիճակում»:
Ստեփանակերտի զորամասերից մեկում 2010թ. մահացած Վալերիկ Մուրադյանի մայրը` Նանա Մուրադյանն էլ մեզ հետ զրույցում համոզմունք հայտնեց, որ նախագահը տեղյակ է ամեն ինչից, սակայն նրան ձեռնտու չէ սեւազգեստ մայրերի որդիների սպանությունների բացահայտումը. «Մեր երեխաներին սպանողները սովորական զինվորներ չեն, այլ հրամանատարներ են, որոնք պահում ու պահպանում են Սերժ Սարգսյանի աթոռը: Ընտրությունների ժամանակ նրանց նման հրամանատարներն են, որ զինվորների ձայներ են հավաքում: Սերժ Սարգսյանը Ղարաբաղի սահմաններին մսաղացի բերան է տալիս մեր զինվորներին: Ապրիլին բոլորը գիտեին, որ հողերը նախօրոք ստորագրված-տված էին, իսկ մեր զինվորները նրանց աթոռները պահեցին, նրանք իրենց գրպաններն են հաստացնում` զինվորների արյան հաշվին»:
Լուիզա ՍՈՒՔԻԱՍՅԱՆ
