Այսօր կառավարության նիստին վարչապետ Հովիկ Աբրահամյանը Կապի եւ տրանսպորտի փոխնախարար Արթուր Առաքելյանի՝ Հյուսիս-Հարավ ծրագրի մասին զեկուցելիս բորբոքված ասաց, որ ծրագրի կապալառուն՝ իսպանական ընկերությունը չարիք է: Հիշեցնենք, որ ծրագիրն իրականացնում է «Կորսան Կորվիամ Կոնստրուքսյոն էս-էյ» կազմակերպությունը:
Նիստից հետո փոխնախարար Առաքելյանը լրագրողների հետ ճեպազրույցում անդրադառնալով թեմային, ոչ մի կերպ չհամաձայնվեց վարչապետի կարծիքին՝ թե ընկերությունը չարիք է:
Փոխնախարարն ասաց, որ Տրանշ 1-ի՝ Արտաշատ-Երեւան եւ Երեւան-Աշտարակ շինարարության ժամանակ, ընկերությունը թերություններ է թույլ տվել, եւ 70 միլիոն դոլարի շինարարության պարագայում, ընկերությունից պահումներ է կատարվել 6 միլիոնի չափով գումար:
Մանրամասն՝ տեսանյութում
Կարդացեք նաև
Իսկ թե ինչո՞ւ է վարչապետի համար այդ ընկերությունը չարիք, Առաքելյանն ասաց, որ վարչապետն այցելել է Աշտարակ–Թալին Տրանշ 2-ի շինարարության հատված եւ աշխատանքները նրան չեն բավարարել, ենթակապալառուների հետ կապված ուշացումներ են եղել:
Փոխնախարարի վստահեցմամբ՝ իսպանական ընկերության հետ պայմանագիրը խզելու հիմքեր եւ պատճառներ չկան:
Դիտարկմանը՝ վարչապետին այդ ընկերությունը չի գոհացնում, Առաքելյանն ասաց. «Վարչապետին գոհացնելու մասին իրեն հարց տվեք, ի՞նչ է նշանակում վարչապետին չի գոհացնում»:
Ապա փոխնախարարն ասաց, որ եւս մեկ անգամ կփորձեն ուսումնասիրել իրավիճակը:
Նելլի ԲԱԲԱՅԱՆ
