Նախագահական նստավայրի դիմաց այսօր հերթական անգամ բողոքի ակցիա էին անում բանակում խաղաղ պայմաններում զոհված զինծառայողների մայրերը: Ոստիկանները նրանց կրկին թույլ չտվեցին մոտենալ նախագահական նստավայրի դարպասներին:
«2010թ. դեկտեմբերի 14-ին խոսել եմ տղայիս հետ, ասեց, որ ամեն ինչ լավ է, բայց հրամանատարը հրաման է տվել թուրքերի հետ թմրանյութի առք ու վաճառք անենք: Ես պատասխանատու եմ ասածներիս համար: Ասացի` Արթուր ջան, տենց բան չանես, ասեց` դե որ հրաման է տալիս…Դա եղավ մեր վերջին խոսակցությունը: Դեկտեմբերի 17-ին իմ տղու դիակը բերել են Մուրացանի հոսպիտալ»,-Aravot.am-ի հետ զրույցում պատմեց 2010թ. Հադրութում մահացած հետախույզ Արթուր Ղազարյանի մայրը: Նա պնդում է, որ իր որդուն սպանել է նրա հրամանատարը, որի «թիկունքը» ՀՀ նախագահն է, իսկ գործը կոծկել են:
Կարդացեք նաև
Նախագահական նստավայրի մայթեզրին այսօր նրան դիմավորել են մի քանի ոստիկաններ եւ թույլ չեն տվել առաջ գնալ: «Ինչի՞ համար, որ ես սեւ շորերո՞վ եմ: Ասեցին, որ իրավունք չունեմ իջնելու: Էս «սեւն» ինձ Աստված չի տվել, Աստված ինձ տղա է տվել, բայց էս «սեւն» ինձ հագցրել է Սերժ Սարգսյանը, քննչականը…»,-վրդովված ասաց նա:
Տիկին Իրինան Բաղրամյան 26-ի հակառակ մայթեզրից հետիոտային անցումով առաջացավ դեպի նախագահական նստավայրի մայթեզր, երկու ոստիկաններն անգամ այդ դեպքում ուղեկցեցին նրան, ապա «պատ» կազմեցին նախագահականի դարպասներից քիչ վերեւ, որտեղ կանգնած էին նաեւ մյուս որդեկորույս մայրերը:
Ի դեպ, մայրերը դժգոհում էին, որ ոստիկանները պատահական քաղաքացիներին թույլատրում էին անցնել, իսկ իրենց` ոչ: Ընդ որում, մինչեւ փողոցը հատելը ոստիկաններից մեկը Իրինա Ղազարյանին ասաց, որ նրան էլ է թույլատրվում, ինչպես բոլոր քաղաքացիներին:
«Չեք թողնում, որովետեւ ես սեւ շորերով եմ, իսկ մյուսները` կարմիր, կապույտ…ժամանակին ես էլ եմ ունեցել այդպիսի շորեր` մինչեւ 2010թ. դեկտեմբերի 17-ը»,-դիմելով ոստիկանին` նշեց Իրինա Ղազարյանը:
«Մենք Ձեր սեւ շորերի համար Ձեր առաջ գլուխ ենք խոնարհում»,-պատասխանեց ոստիկանը:
Լուիզա ՍՈՒՔԻԱՍՅԱՆ
