Վարչապետ Հովիկ Աբրահամյանը կառավարության այսօրվա նիստի սկզբում հիշեցրեց, որ մարտի 24-ի նիստում Վերահսկիչ պալատին հանձնարարվել է ուսումնասիրել սոցիալական փաթեթի հետ կապված խնդիրները: ՎՊ նախագահ Իշխան Զաքարյանը հայտարարեց, որ ուսումնասիրությունների արդյունքում հայտնաբերվել է շուրջ 300 միլիոն դրամի խախտում:
«Վերահսկիչ պալատը ուսումնասիրություններ է իրականացրել ՀՀ խոշոր հանգստյան գոտիներ համարվող Ծաղկաձորի, Դիլիջանի, Արտավանի, Աղվերանի, Արզնիի եւ Հանքավանի ընտրանքային կարգով ուսումնասիրված հյուրանոցներում եւ հայտնաբերել է շուրջ 300 միլիոն դրամի տարբեր տիպի խախտումներ»,- ասաց ՎՊ նախագահը:
Ըստ Իշխան Զաքարյանի՝ Ծաղկաձորում ՎՊ-ն ուսումնասիրել է 21 հանգստյան տներ եւ հյուրանոցներ՝ հայտնաբերելով 128 միլիոն 681 հազար դրամի խախտում, Ջերմուկ քաղաքում՝ 13 հանգստյան տներ եւ հյուրանոցներ, որի արդյունքում հայտնաբերվել է 62 միլիոն 432 հազար դրամի խախտում: Դիլիջանում ուսումնասիրվել է 7 հանգստյան տուն եւ հյուրանոց, հայտնաբերվել է շուրջ 44 միլիոնի խախտում:
«Ընդհանրապես պետական բյուջեի միջոցները երկու ուղղությամբ են ծախսվում, առաջինը՝ հանգստի կազմակերպման, երկրորդը՝ առողջապահության կազմակերպման հետ է կապված»,- ասաց ՎՊ նախագահը: Հանգստի կազմակերպման գործընթացում ներգրավված են եղել 69 զբոսաշրջային օպերատորներ:
ՎՊ-ն ուսումնասիրություններ է իրականացրել 7 ընկերություններում: Որոշ ընկերություններ լիարժեք չեն կատարել իրենց պարտավորությունները: Քանի որ, ըստ Իշխան Զաքարյանի, սոցփաթեթները հատկացվել են ոչ իրական շահառուներին, ՎՊ-ն առաջարկեց կառավարությանը լրամշակել սոցիալական փաթեթի հանգստին վերաբերող դրույթը: Ուսումնասիրությունները շարունակվում են, ամբողջապես փաթեթը պետք է նայվի: Իսկ դա նշանակում է, որ հանգստի բաղադրիչը կկասեցվի՝ ինչպես արդեն կառավարության նախորդ նիստում հայտարարվել էր:
Նելլի ԲԱԲԱՅԱՆ
