Շատերիս սննդակարգում հացը կարեւոր սննդամթերք է: Այն պարունակում է սպիտակուցներ, ածխաջրեր, վիտամիններ (հիմնականում՝ B խմբի), հանքային նյութեր եւ բջջանյութ:
Հացի որակի ցուցանիշներ են արտաքին տեսքը, փափուկ միջուկի վիճակը, համը, հոտը, ինչպես նաեւ խոնավությունը, թթվայնությունը եւ ծակոտկենությունը: Պահպանման ընթացքում հացը հնանում է, սակայն նրա կենսաբանական եւ սննդային արժեքները չեն նվազում: Թեթեւակի հին եւ չոր հացը նույնիսկ ավելի հեշտ է մարսվում:
Հացի լավ պահպանման համար անհրաժեշտ է այն չդնել այլ սննդամթերքների կողքին, իսկ եթե ցանկանում եք, որ թարմ մնա` հացամանի մեջ աղ կամ հում կարտոֆիլ դրեք:
Սեւ եւ սպիտակ հացը հացամանի մեջ միասին չի կարելի պահել: Այն չի բորբոսնի, եթե յոդի մի քանի կաթիլով թաթախված բամբակը դնեք փոքրիկ տուփի մեջ եւ տեղավորեք հացամանում:
Հացը երկար ժամանակ թարմ կմնա, եթե հացամանի մեջ մի կտոր շաքար կամ կիսված խնձոր դնեք:
Հացամանը շաբաթը մեկ անգամ պետք է լվանալ թույլ քացախաջրով:
Չորացած հացը կարելի է թարմացնել, եթե այն թաթախվի կաթի մեջ, ապա 15 րոպե պահվի ջեռոցում:
Չորացած հացը փաթաթել թաց թղթով եւ մի քանի րոպե պահել ջեռոցում:
Հացն ու խմորեղենը չի կարելի պահել նույն ամանի մեջ, կփչանա եւ հացը, եւ խմորեղենը:
Հնացած հացից ի վերջո կարելի է պաքսիմատ պատրաստել, կտրատել մանր քառակուսիների եւ չորացնել ջեռոցում:
Խուսափեք տաք եւ բուրումնավետ հացից, որովհետեւ հացը ամենաշուտ գիրացնող սննդամթերքն է:
Պատրաստեց ԱՆՈՒՇ ՄԱԹԵՎՈՍՅԱՆԸ
«Առավոտ»
13.07.2016
