Ճապոնիայում ՀՀ դեսպան Հրանտ Պողոսյանի նախաձեռնությամբ հուլիսի 8-ին 1 միլիոն 20 հազար յին կամ որ նույնն է՝ 10 հազար ամերիկյան դոլար է հավաքվել Գյումրիի Ա. Բրուտյանի անվան երաժշտական դպրոցին օգնելու համար: Դեսպանը Ճապոնիայի Նագոյա քաղաքում Կալիֆորնիայի «Տոպպո մյուզիք» կազմակերպության հետ համատեղ կազմակերպել է երգիչ, երգահան ու դերասանուհի Ստեֆանի Թոփալյանի (նա «Եվրատեսիլ 2015» երգի միջազգային մրցույթի Հայաստանը ներկայացնող վեց մասնակիցների ցանկում էր, բնակվում է Ճապոնիայում Ա.Ն.) համերգ-ճաշկերույթը՝ հրավիրելով ճապոնացի հայտնի գործարարների ու մշակութային գործիչների, որոնք էլ Գյումրու երաժշտական դպրոցին օգնելու համար գումար են հանգանակել:
Ինչպես այսօր ներկայացրեց Գյումրու քաղաքապետ Սամվել Բալասանյանը, դեսպան Պողոսյանը, վերջերս զանգահարելով իրեն, ասել է, որ ուզում է օգնել որեւէ երաժշտական դպրոցի: Սամվել Բալասանյանն էլ, իր հերթին, առաջարկը քննարկելով մշակույթի բաժնի աշխատակիցների հետ, որոշել է սաքսոֆոնի 5-րդ դասարանի սան,14-ամյա Ավետիս Հովսեփյանին ուղարկել Ճապոնիա՝ ակցիային մասնակցելու ու Գյումրիի կողմից երաժշտության միջոցով իր շնորհակալական խոսքը հղելու: Տղան վերադարձել է 10 հազար ամերիկյան դոլարով: Ըստ Սամվել Բալասանյանի, հաշվեհամար կբացեն ու կտեսնեն՝ ինչի պահանջ ունի դպրոցը՝ գործիքների՞, ջեռուցմա՞ն:
Կարդացեք նաև
Ավետիս Հովսեփյանն էլ իր հերթին պատմում է, որ հանդես է եկել ջազային, դասական ու հայկական երաժշտության կատարմամբ, ճապոնացիներին առավել դուր է եկել ջազային կատարումը: Ավետիսը պատմում է, որ Տոկիոյից դեսպանի հետ ուղեւորվել է Նագոյա քաղաք, այնտեղի քաղաքապետի հետ հանդիպելուց ու պատմական տարբեր վայրեր շրջելուց հետո մասնակցել է երեկոյան ճաշկերույթի: Սկզբում ելույթ է ունեցել Ստեֆանի Թոփալյանը, այնուհետ՝ ինքը: «Մասնակիցների մեծ մասը հայտնի բիզնեսմեններ էին, հրավիրած էին դեսպանի կողմից»,- պատմեց Ավետիսը:
Սամվել Բալասանյանն էլ իր հերթին պարծենալով արձագանքեց. «Ասեմ, որ մեր դեսպանը՝ Հրանտ Պողոսյանը, գյումրեցի է, շատ լավ մարդ է, ես հատուկ շնորհակալություն եմ հայտնելու իրեն իր հարազատ քաղաքի համար նման ակցիա կազմակերպելու համար»:
Նունե ԱՐԵՎՇԱՏՅԱՆ
