«Ցանկացած քաղաքական ուժ պետք է ներկայացված լինի բնականաբար: Ակնհայտ է, որ ՀՀԿ-ն, ինչպես մյուս խոշոր կուսակցությունները` պայքարելու է ՏԻՄ ընտրություններին, հատկապես՝ խոշոր քաղաքներում ներկայացված լինելու համար: ՀՀԿ-ն ունի վերլուծական կարողություն, որ կարողանա շեշտը, դրույքը դնել այդ պահին ամենաուժեղ եւ հաղթող թեկնածուի վրա»,- այսօր հրավիրած ասուլիսում ՀՀԿ փոխնախագահ Արմեն Աշոտյանն այսպես բացատրեց Սամվել Բալասանյանին Գյումրիի ընտրություններում ՀՀԿ-ի թեկնածու դարձնելը:
Թե ինչու հենց Սամվել Բալասանյանը՝ նա ասաց. «Մեզ համար կարեւոր է, որ գյումրեցին այս տարիների ընթացքում տեսել է, ըստ հավաստի տեղեկությունների, բարձր է գնահատել գործող քաղաքապետի կազմակերպչական ջիղը, նվիրվածությունը քաղաքին: Այն աշխատանքները, որ իրականացնում է գործող քաղաքապետ Սամվել Բալասանյանը, մեզ թույլ են տալիս եւս մեկ անգամ փաստելու, որ մենք մեր թիմային աշխատանքի շնորհիվ կարող ենք Սամվել Բալասանյանի կողմից ցուցակը գլխավորելով՝ Գյումրիում գնալ հաջողությունների: Իհարկե, որոշելու է գյումրեցին»:
Նա ասաց, թե չի կարելի միայն կուսակցականներով բոլոր ընտրություններին մասնակցել, դա կլինի քաղաքական մենաշնորհ, որի համար իրենց քննադատում են. «Մենք չունենք այն վատ ավանդույթը, դոգման, որ անպայման բոլորը պետք է լինեն ՀՀԿ-ական, կուսակցական տոմսով: Մենք միշտ ներգրավելու ենք լավագույն կադրերին, լավագույն հմտություններ ունեցող մարդկանց պոտենցիալն օգտագործելու: Չենք ուզում եւ չենք լինի Կոմունիստական կուսակցություն»:
Արմեն Աշոտյանն ասաց, որ Գյումրիում իրենց նախընտրական շանսերը շատ բարձր է գնահատում, հատկապես դաշինքով գնալը հետաքրքիր է. «Զարմանալի չէ Քրիստոնեա-դեմոկրատական միության հետ մեր դաշինքը: Չզարմանաք, եթե ՀՀԿ-ի հետ աշխատող քաղաքական ուժերը մոտ ապագայում նույնպես Գյումրիում մեզ հետ միասին գնալու մասին հայտարարություն ընդունեն»:
Կարդացեք նաև
Մեր հարցին՝ Խոսրով Հարությունյանի հետ դաշինքով գնալը ի՞նչ է ձեզ տալու եւ Գեղամյանի կուսակցությունն էլ ինչո՞ւ չի միանում՝ Արմեն Աշոտյանը պատասխանեց. «Ես ասացի՝ չզարմանաք, եթե մոտ ապագայում միանան: Դաշինքով գնալը հետաքրքիր է»:
Հռիփսիմե ՋԵԲԵՋՅԱՆ
