Ծանրամարտի միջազգային ֆեդերացիան Ադրբեջանի հավաքականին զրկել է Ռիո դե Ժանեյրոյի օլիմպիական խաղերին մասնակցելուց՝ նրանից վերցնելով 3 ուղեգրերը, որ նրանք ձեռք էին բերել աշխարհի վերջին երկու առաջնությունների արդյունքով:
Պատճառն այն է, որ նույն՝ աշխարհի վերջին երկու առաջնություններում, դոպինգ օգտագործած լինելու պատճառով որակազրկվել էին հարեւան երկրի վեց ծանրորդներ: Իսկ 2008 եւ 2012 թվականների օլիմպիական խաղերի դոպինգ անալիզների վերստուգման արդյունքով նրանց միացել էին նաեւ Սարդար Հասանովը (2008) եւ Բոյանկա Կոստովան (2012): Սակայն Ադրբեջանի ծանրամարտի ֆեդերացիան մտադիր է դիմել Սպորտային արբիտրաժային դատարան՝ IWF-ի այդ որոշումը բողոքարկելու:
Սովորական է դարձել, որ հարեւան երկրում ամեն բան, այդ թվում նաեւ՝ սպորտում, տեսնում են ոտնիվեր ու մեկնաբանում միայն իրենց «հասկանալի» տեսանկյունից: Օրինակ, նշում են, թե իրենց մոտ ստեղծել են առաջավոր մարզական ենթակառուցվածքներ՝ նյութատեխնիկական լայն բազայով, ծանրամարտի ակադեմիան գործում է հաջող եւ որ Ադրբեջանի ծանրորդները իրենց լավ են դրսեւորել միջազգային ասպարեզներում: Թե ինչ են ստեղծել եւ այդ ստեղծածը ինչպես է աշխատում, պարզ երեւում է ծանրամարտում որակազրկված մարզիկների թվով: Մասնավորապես, միայն 2013 թվականին որակազրկվել է ադրբեջանցի 18 ծանրորդ: Բացի դա, հենց այնպես չէ, որ անգործունակության համար Ադրբեջանի անդամակցությունը ժամանակավորապես դադարեցվել է Արեւելյան Եվրոպայի տարածքային հակադոպինգային կազմակերպությունում:
Կարդացեք նաև
ԱՇՈՏ ՀԱԿՈԲՅԱՆ
«Առավոտ»
12.07.2016
