2015 թվականին մի թրքուհի պարզում է, որ մեծ տատը Ցեղասպանությունը վերապրողներից է, և որոշում է մեկնել Հայաստան՝ մասնակցելու 100-րդ տարելիցին: Մայան այս խնդրի մարմնավորումն է, քանի որ և՛ հայ է, և՛ թուրք: Նրա ներսում երկու մարդ է ապրում. մեկը տառապում է Ցեղասպանության պատճառով, մյուսը՝ հերքում այդ փաստը:
Լոս Անջելեսում ապրող հայ ռեժիսոր Նարե Մկրտչյանի «Տան մյուս կողմը» վավերագրական ֆիլմն ընդգրկված է «Ոսկե ծիրան» Երևանի 13-րդ միջազգային կինոփառատոնի «Հայկական համայնապատկեր» ծրագրում:
«Պապիկս ու տատիկս Հայոց ցեղասպանությունից փրկվածներ են: Ես շատ էի ցանկանում որևէ ֆիլմով անդրադառնալ այդ թեմային: Բայց այնպես, որ ոչ թե կոնկրետ Հայոց ցեղասպանության, այլ մարդկային տանջանքի մասին լիներ: Դրա համար փորձեցի գտնել մի թուրքի, որը պարզում է՝ իր մեջ հայի արյուն կա: Ինձ հետաքրքրում էր այդ ներքին հակամարտությունը»,- այսօր լրագրողների հետ հանդիպման ժամանակ ասաց Նարե Մկրտչյանը:
Նրա համար դժվար է եղել գտնել այնպիսի թուրքի, որը տեսախցիկի առաջ կխոսի Հայոց ցեղասպանության և իր ինքնության մասին:
Կարդացեք նաև
«Ի վերջո գտա Մայային: Չգիտեի, որ նա չի ընդունում Հայոց ցեղասպանությունը, քանի որ մեր նամակագրության մեջ գործածում էր այդ բառը: Իսկական շոկ էր ինձ համար, որ տեսախցիկի առաջ չասաց ցեղասպանություն: Ֆիլմը նկարահանելուց մեկ տարի հետո խոստովանեց, որ շատ վատ է զգում, որ վախի պատճառով չի կարողացել ասել այդ բառը»,- պատմեց ամերիկահայ ռեժիսորը:
«Տան մյուս կողմը» ֆիլմը կցուցադրվի հուլիսի 13-ին և 15-ին «Մոսկվա» կինոթատրոնում:
Սիրանուշ ՀԱՅՐԱՊԵՏՅԱՆ
