Ադրբեջանի Հանրապետության նախագահ Իլհամ Ալիևն Ադրբեջանի կառավարության նիստի ընթացքում ելույթ է ունեցել, որի ընթացքում խոսել է Լեռնային Ղարաբաղի հակամարտության կարգավորման գործընթացի մասին։ Այս մասին տեղեկացնում է Trend լրատվական գործակալությունը։
2016թ. ապրիլի սկզբին հակամարտության շփման գոտում տեղի ունեցած բախումների համար Ալիևը գլխավոր մեղավոր է համարել Հայաստանի Հանրապետությանը. «Հայաստանի մտադրությունները հայտնի են. տարբեր ճանապարհներով նրանք փորձում են խախտել բանակցությունները, իսկ երբ տեսնում են, որ միջազգային հանրության ճնշումը մեծանում է, դիմում են հերթական սադրանքների»։
Ադրբեջանի նախագահը նշել է, որ հակամարտությունն անհրաժեշտ է կարգավորել մոտ ապագայում. «Այլապես ոչ ոք չի կարող երաշխավորել, որ սադրանքները չեն կրկնվի, որովհետև Հայաստանի մտադրությունը հակամարտությունը սառը վիճակում պահելն է»։
Ալիևն ասել է նաև, որ անհրաժեշտ է փոխել հակամարտության ստատուս-քվոն՝ ավելացնելով, որ հակամարտության կարգավորման բանակցային գործընթացը ներկայումս չափազանց ակտիվ փուլում է։
