ՄԱԿ-ի բնակչության հիմնադրամի «Հայաստանի Հանրապետության բնակչության իրավիճակային վերլուծություն» հետազոտության շուրջ, որն իրականացվել է «Օժանդակություն բնակչության հարցերով քաղաքականությունների իրականացմանը» ծրագրի շրջանակներում, այսօր ՄԱԿ-ի հայաստանյան գրասենյակի ներկայացուցիչները բավականին մտահոգիչ ժողովրդագրական ցուցանիշներ ներկայացրեցին:
Մասնավորապես՝ մեր երկրում բնակչության բնական աճն անցյալ տարի զրոյացել է, իսկ այս տարի բացասական միտում կլինի:
Ըստ նույն հետազոտության, նվազել են ծնելիության ցուցանիշները, Հայաստանում 65 տարեկանից բարձր բնակչությունը կազմում է 10.7%, ինչը գերազանցում է ծերացող բնակչությամբ երկիր համարվելու 7%-անոց շեմը:
Aravot.am-ը ՄԱԿ-ի Բնակչության հիմնադրամի հայաստանյան գրասենյակի գործադիր ներկայացուցիչ Գարիկ Հայրապետյանից հետաքրքրվեց՝ ի՞նչ կանխատեսումներ ունի գրասենյակը 2050 թվականի հաշվարկով, ինչպիսին կլինի ժողովրդագրական իրավիճակը այդ տարիներին: «Դեպի նվազման է գնալու: Ամենալավատեսական կանխատեսումներով, շատ, շատ դրական ցուցանիշներով 2050 թվականին Հայաստանի բնակչությունը կլինի 3 միլիոն 100 հազար, իսկ ամենաբացասական ցուցանիշներով՝ 1 միլիոն 700»,-ասաց Հայրապետյանը:
Կարդացեք նաև
Նրա խոսքերով՝ երկրի բնակչության թվի նվազումը լուրջ մտահոգություն է. օրինակ տնտեսապես գրավիչ լինելու համար ամենաքիչը տվյալ երկրում պետք է 5 միլիոն սպառող լինի, որպեսզի երկիրը հրապուրիչ լինի օտարերկրյա ներդրումների համար:
Մանրամասն՝ տեսանյութում
Այսօր «Հոդված 3» մամուլի ակումբում ներկայացվեցին Հայաստանի ժողովրդագրական ցուցանիշներին վերաբերող հետազոտության տվյալները:
Ասուլիսի մեկ այլ մասնակից, ՄԱԿ-ի Բնակչության հիմնադրամի հայաստանյան գրասենյակի «Օժանդակություն բնակչության հարցերով քաղաքականությունների իրականացմանը» ծրագրի համակարգող Աննա Հովհաննիսյանն է ասաց, որ ըստ պաշտոնական վիճակագրության, Հայաստանի հանրապետության բնակչությունը 2016 թվականի հունվարի 1-ին կազմել է 2 միլիոն 998 հազար մարդ, որը 2015-ի հունվարի 1-ի դրությամբ նվազել է 14 հազարով: Այս նվազումը կապված է բնակչության բնական աճի բացասական միտումներով. Այսինքն՝ համադրվել են ծնունդների եւ մահերի թվերը:
Աննա Հովհաննիսյանի ներկայացմամբ՝ ազգային վիճակագրական ծառայության եռամսյակային ցուցանիշներով, այս տարվա ապրիլի 1-ի դրությամբ եւս 4000- ով նվազել է բնակչության թիվը՝ 2016-ի ապրիլի 1-ին այն կազմել է 2 միլիոն 994 հազար մարդ:
Հովհաննիսյանն ասաց, որ եթե առաջիկա եռամսյակներն էլ հաշվարկենք, ապա կանխատեսվում է, որ տարեվերջին մեր երկրի բնակչությունը տարվա կտրվածքով 16 հազարով կնվազի:
Մանրամասն՝ տեսանյութում
Նելլի ԲԱԲԱՅԱՆ
