ՀՀԿ խմբակցության պատգամավոր Լևոն Մարտիրոսյանը պարզաբանում է, թե Ընտրական օրենսգրքում փոփոխություններ և լրացումներ կատարելու մասին օրենքի նախագծի քննարկման ժամանակ իր հայտարարությունը, թե «Հենրիխ Մխիթարյանի գործակալին դիմենք, որ մի կետ ավելացնի ֆուտբոլիստի երկրի ժողովրդավարացման համար՝ մի քանի միլիոն հատկացնեն», կատակ է եղել:
«Հայելի» ակումբում հրավիրված ասուլիսին պարոն Մարտիրոսյանից լրագրողները հետաքրքրվեցին` ի վերջո դիմե՞լ են, պարոն Մարտիրոսյանը պատասխանեց. «Ես ասել եմ դիմենք Հենրիխ Մխիթարյանի գործակալին, ոչ թե Հենրիխ Մխիթարյանին, իսկ դրանք տարբեր բաներ են: Ֆուտբոլից գոնե մի քիչ հասկացող մարդիկ պատկերացնում են, որ այդ գումարը ոչ Հենրիխին է գնում, ոչ էլ Հայաստանին, մի ակումբը մյուսին է փոխանցում. ցանկացած դեպքում մենք այդ գումարների հետ կապ ունենալ չենք կարող: Ես այն ժամանակ էլ այդ հայտարարությունն անելուց առաջ ասացի, որ կատակ եմ անում: Ուղղակի ուզում էի ասած լինել, որ խոսքն այնքան ոչ էական գումարի մասին է, որ վստահ եմ` այդ գումարը հնարավոր կլինի գտնել:
Եթե չեմ սխալվում, արդեն առյուծի բաժինը միջազգային դոնոր կազմակերպություններն են հատկացրել, ինչպես նաև մեր պետական բյուջեից: Պիտի հայթայթվեն այդ գումարները, որպեսզի մեր ընտրությունների նկատմամբ վստահությունը բարձրացնենք»:
Տաթև ՀԱՐՈՒԹՅՈՒՆՅԱՆ
