Ապրիլի 5-ին Հայկական հոգեբուժական ասոցիացիան հայտարարել էր, որ իր գործընկեր կառույցներն ապրիլյան ռազմական գործողությունների մասնակից-զինծառայողներին եւ նրանց ընտանիքի անդամներին անվճար հոգեբանական եւ հոգեբուժական ծառայություններ կմատուցեն: Այս ընթացքում համապատասխան օգնություն է ցուցաբերվել Արցախում 121, իսկ ՀՀ-ում` 94 անձի: Այս մասին այսօր «Դիալոգ» մամուլի ակումբում լրագրողներին հայտնեց Հայկական հոգեբուժական ասոցիացիայի նախագահ Արմեն Սողոյանը:
Նա նշեց, որ մասնագետներն աշխատել են բուժհաստատություններում գտնվող զինծառայողների, զոհված զինծառայողների ընտանիքների հետ: «Այժմ, երբ զորացրվում են մարտական գործողություների մասնակցած զինծառայողները, պատրաստ ենք բոլորին ապահովել անվճար հոգեբանական օգնությամբ` համագործակցող կազմակերպությունների միջոցով»,-հայտնեց նա:
Սողոյանի բնորոշմամբ` ասոցիացիայի նախաձեռնությունը բարեգործություն որակելը ճիշտ չէ, պարզապես մասնագետները փորձում են օգտակար լինել զինծառայողներին եւ նրանց հարազատներին: Արմեն Սողոյանը տեղեկացրեց, որ ասոցիացիայի գործընկեր-կազմակերպությունները զորացրվածների համար հոգեբանական ծառայություններ կմատուցեն ինչպես ՀՀ-ում, այնպես էլ Արցախում:
Ծառայությունների մասին մանրամասն կարելի է տեղեկանալ Արցախում գործող «Էմպաթիա» հոգեսոցիալական կարգավորման կենտրոնի «ֆեյսբուքյան» էջից:
Կարդացեք նաև
Լուիզա ՍՈՒՔԻԱՍՅԱՆ
