Ճարտարապետները հիշեցնում են, որ «Զվարթնոց» օդանավակայանի հին շենքը Հայաստանի սեփականությունն է: Այն չի նվիրվել արգենտինահայ գործարար Էդուարդո Էռնեկյանին, այլ տրվել է վարձակալության՝ պայմանով, որ բարվոք վիճակում պահվի։
«Սակայն տարիների ընթացքում կոնցեսիոները կառուցեց նոր մասնաշենք, հրաժարվեց հին շենքից ու թողեց լքյալ վիճակում: Այս ընթացքում նա որևէ ներդրում չի արել շենքի պահպանման համար, պետությունն էլ գումար չի ներդրել, քանի որ բյուջեն այդ հնարավորությունը չի տալիս»,- «Պոստ սկրիպտում» մամուլի ակումբում այսօր լրագրողների հետ հանդիպման ժամանակ ասաց ճարտարապետ Սաշուր Քալաշյանը:
Ճարտարապետների միության նախագահ Մկրտիչ Մինասյանի խոսքով՝ իրենք որքան ժամանակ է՝ կոնցեսիոների ճարտարապետների հետ հանդիպում են պահանջում՝ միասին քննարկելու իրականացվող աշխատանքները, սակայն ապարդյուն:
«Նրանք չեն ուզում հանդիպել: Եթե դա արհամարհանք է, ապա այդ վերաբերմունքը շատ վտանգավոր է: Նախապես ասվել էր, որ շենքի աշտարակային մասը, մեծ շրջագիծը աշխատելու են պահել, սակայն կյանքը ցույց է տալիս, որ փոքր քանդումները հետագայում կարող են բերել մեծ քանդումների»,- նշեց Մկրտիչ Մինասյանը:
Կարդացեք նաև
«Զվարթնոց» օդանավակայանի հին մասնաշենքն ընդգրկված չէ պետության կողմից պահպանվող հուշարձանների ցանկ: Հենց դա է պատճառը, որ այսօր ճարտարապետները չեն կարողանում պետական մարմիններից որևէ բան պահանջել հին մասնաշենքը չքանդելու համար:
Չնայած դրան՝ Մ. Մինասյանը վստահեցնում է, որ շատ անգամներ են տարբեր կառույցների դիմել. «Տարիներ առաջ առաջարկել ենք «Զվարթնոց»-ի շենքն ընդգրկել պետության կողմից պահպանվող հուշարձանների ցանկ, բայց ապարդյուն»,- ասաց Ճարտարապետների միության նախագահը:
«Կռիվը մեր ու «Զվարթնոց»-ի կոնցեսիոների միջև է. կառավարությունն իր բոլոր օղակներով կողքի է կանգնած: Ոչ միայն կողքի է կանգնած, այլև ամեն ինչով նպաստում է, որ կոնցեսիոների նպատակներն իրագործվեն»,- հավելեց Սաշուր Քալաշյանը:
Սիրանուշ ՀԱՅՐԱՊԵՏՅԱՆ
