Ավիափոխադրումների ոլորտում սպառողներին մատուցվող ծառայությունները Էկոնոմիկայի նախարար Արծվիկ Մինասյանի մտահոգությունն են առաջացնում: «Էլիտ պլազա» բիզնես կենտրոնում պարոն Մինասյանն անդրադարձավ քաղավիացիայի ոլորտում գնագոյացման մեխանիզմներին ու ավիատոմսերի գրեթե կրկնակի թանկացմանը:
«Մենք թե կարողությունների հզորացման, թե համակարգի ավելի լավ ուսումնասիրման աշխատանքի մեջ ենք: Սա էկոնոմիկայի նախարարության եւ տնտեսական մրցակցությունը պաշտպանող հանձնաժողովի, ինչպես նաեւ այլ իրավասու մարմինների քննարկման հարցը պետք է լինի»,-ասաց Արծվիկ Մինասյանը:
Այսօր պարոն Մինասյանը մասնակցում էր Ձեռներեցության հարցերով եվրասիական տնտեսական հանձնաժողովի կոլեգիային կից խորհրդատվական կոմիտեի 9-րդ նիստին, որն անցկացվեց փակ դռների հետեւում: Լրագրողները մասնակցեցին միայն արարողակարգային մասին:
Էկոնոմիկայի նախարարին հիշեցնելով ռուսական սահմանակետերում առկա կոռուպցիայի մասին, որին շատ հաճախ բախվում են հայ գործարարները, լրագրողները հետաքրքրվեցին, թե ի՞նչ է անում հայկական կողմը ռուսական կոռուպցիայի դեմ պայքարելու համար:
Կարդացեք նաև
Արծվիկ Մինասյանն ասաց, որ այն լուրջ խնդիր է եւ առաջին անգամ չէ, որ այդ հարցը բարձրացվում է: Նախարարը նաեւ ասաց, որ տրանսպորտի եւ կապի նախարար Գագիկ Բեգլարյանը փորձում է օպերատիվ միջամտություններ անել, սակայն այն, ինչ կապված է ռուսական տարանցիկ հատվածներում կոռուպցիոն երեւույթների հետ, ապա ռուսական իշխանությունների հետ համատեղ պետք է համակարգային լուծում տրվի:
Մանրամասները` տեսանյութում
Անդրադառնալով այս օրերին Լարսի անցակետի փակման պատճառով գործարարների մոտ առաջացած խնդիրներին, Արծվիկ Մինասյանն ասաց, որ այդ երեւույթը բացասաբար է ազդում բեռնափոխադրման, առեւտրաշրջանառության վրա հատկապես այս սեզոնին: Թե որքան վնասներ են կրել ճանապարհի պատճառով, պարոն Մինասյանն ասաց, որ դեռեւս հաշվարկներ չկան, քանի որ ամեն րոպե իրավիճակ է փոխվում:
Նախարարի խոսքերով՝ Ռուսաստանում Հայաստանի առեւտրային ներկայացուցիչը հանձնարարական է ստացել, որպեսզի գոնե արդեն տեղ հասցված ապրանքն արագ իրացվի, քան նախկինում էր, երբ անցնում էր իրացման համար նախատեսված ընթացակարգերով:
Արծվիկ Մինասյանի խոսքերով, կառավարությունը Վերին Լարսի խնդիրը լուծելու մեխանիզմներ է մշակում:
Լուսինե ԲՈՒԴԱՂՅԱՆ
